唐人新年

出自維基百科,自由嘅百科全書
(由春節跳轉過嚟)
唐人新年
繁體字
簡化字
對聯揮春同兩盤大桔
利是封
全盒
舞獅(加拿大卑詩省列治文

唐人新年tong4 jan4 san1 nin4唐人曆裏面一年嘅開始,又叫做中華新年新春。因為喺春天,所以北方人多數叫春節ceon1 zit3簡化字春节)。雖然1912年中華民國成立就轉用公曆,但係新年多數講唐人曆法,而公曆多數叫元旦。新年對唐人來講係好重要嘅節日。傳統來講,成個節係由正月初一正月十五。而新年之前十二月唔同日子有唔同準備。廣東人會叫呢段日子做嘅嘢做過年

唐人曆法因為要就埋月,又有閏月,一年長短唔定,所以同天文講嘅,地球圍住太陽行咗啱啱一個圈唔同。不過,其實唐人都有呢種定義嘅年,就係做冬,即係冬節冬至。所以廣東話就有句,冬大過年。因為一年長短唔定,所以同公曆對照,年初一對公曆日子就年年唔同。

[編輯]

《尚書》曰:「正元日,舜格于文祖。」又曰:「正月朔旦,受命于神,宗率百官,若帝之初。」《玉燭寶典》曰:「正月為端月。」正月首日稱元日,元,善之長也。元日亦曰上日、正朝、三元。南朝《荊土歲時記》曰:庭前爆竹,以辟山臊惡鬼也。山臊,後人或謂之年獸。古有正月飲屠蘇之俗。

新年日子[編輯]

通常十二月尾到正月初,呢段日子都會用年開頭,例如十二月廿八,就叫年廿八;十二月三十,就叫年三十;正月初一,就叫年初一;如此類推。

唔同日子就另有叫法,年初一之前嗰晚,即係年三十晚或年廿九晚,就叫除夕,或者大除夕;年十五,即係新年最尾嗰日,叫元宵,或者元宵節

習俗[編輯]

新年習俗主題係去舊迎新。會趁年初一之前,將啲唔好嘅嘢掉咗佢,買過啲新。又或者將舊嘅嘢翻新。買新剪頭髮年廿八洗邋遢,都係其中一部份。

廣東人會食團年飯,成家無論響邊都好,都會返屋企聚埋成家一齊食餐飯,代表一家團圓。到新正頭(年初一或者年初二),成家人又會食開年飯

廣州民間嘅農曆新年習俗歌[1]

初一人拜神,初二人拜人,初三窮鬼日,初四人乞米,初五初六正是年,初七尋春去,初八八不歸,初九九頭空,初十打春去,十一打仔回,十二搭燈棚,十三人開燈,十四燈火明,十五祈完燈,采青走百病。

正月初一[編輯]

呢日嗌元日,呢日凌晨啲街坊就會起身祭祖拜神、劏雞,兼且焚香、燒爆竹,意係搶春

年初二[編輯]

到初二朝頭早,家中婦女就要主持開鑊,落生油,煎蘿蔔糕、煎魚,準備埋開年飯。呢日又俗稱姑爺節,係返親家嘅日子。廣州一啲郊區農村仲有放生習俗,係買生鯉魚,用紅紙冚埋魚眼,拜完神後放生條魚落河塘[2]

年初三[編輯]

呢日係赤口日,窮鬼日。呢日晨早起身屋企第一件事,就係掃窮鬼,掃走初一落來積落嘅垃圾,意味著掃走污糟同窮氣。

呢日大家通常唔會去拜年,因為初三赤口,又稱赤狗日。據話赤狗係執掌口怒嘅神,撞到易起口角,所以大家會晤出街費事惹屎上身。後生輩就唔會太在乎呢啲。

年初四[編輯]

呢日係財神嘅生日,所以就有接財神,生日前一日各家就備齊啲酒席,同財神賀辰。儀式一般喺下晝到晚黑搞,準備供品有三牲、生果、茶、糖果等。如果舊年唔如意嘅就一碗清水、三支香祭灶王,舊年發達嘅就用雞鴨魚肉祭拜。

年初七[編輯]

初七係人日,廣東人俗稱眾人生日。晨早廣州人會設埋豐盛嘅家庭筵席慶人日,必備七樣菜(芹菜、芥菜、菠菜、青蔥、大蒜等)製成嘅七寶羹。街坊回憶七寶羹包括芹菜、蒜、蔥、油麥菜芫茜黃芽白、生菜,開食前屋企長輩會講啲祝辭,如闔家清清白白、新年回春、聰明勤勞、諸事合算等,據話食咗七樣菜,呢年就有得執金拾銀,財運登門[3]。據話民國以前,啲後生會群埋一齊游花地,揀埋最靚嘅女仔做人日皇后,由「皇后」來主持呢日啲活動。

年初八[編輯]

俗語有話:初七七不去,初八八不歸。初七出門探親等人,初八就唔返屋企留喺親戚度住。

年初九[編輯]

呢日係九皇誕,老廣州會拎啲雞鴨魚肉出來拜玉皇大帝。

初十同十一[編輯]

廣州郊區農村,相鄰兩條村啲化骨龍呢兩日會打石仗(打春去),邊條村贏就代表新年會更好(啲大人收尾會趕啲細路返歸)。

初十二[編輯]

呢日各家各戶都會點燈掛街邊,廣州啲村啲祠堂都會點埋燈。

正月十五[編輯]

廣州人呢日會去睇花燈。而廣州郊區農村度,舊年添咗男丁嘅呢日都會去祖祠度掛個燈籠,表示向祖宗報到[2]。呢日係元宵,要食湯圓

過年嘢食[編輯]

粵語地區過年興食以下呢啲嘢。

至於臘八,食臘八粥,浸臘八蒜。至於小年,供麥芽糖

至於除夕,同賀新春,共食團年飯。亦整餃子、年糕、春卷等。

睇埋[編輯]

參考[編輯]

  1. 广州春节习俗多:正月初一拜神贺新岁 吃斋留福气 互聯網檔案館歸檔,歸檔日期2020年3月16號,.,网易新媒体 2017-02-14
  2. 2.0 2.1 广州人过年既现代又传统,初一到十五 日日有讲究 互聯網檔案館歸檔,歸檔日期2020年3月16號,.,2008-02-29 广州日报
  3. 民俗:正月初七“人日” 要吃“七宝羹” 互聯網檔案館歸檔,歸檔日期2020年3月16號,. 2013年02月16號 大洋網

出面網頁[編輯]