李娜 (網球手)

出自維基百科,自由嘅百科全書
跳去: 定向搵嘢
李娜喺2009年美國網球公開賽

李娜1982年2月26號—)係中華人民共和國嘅女網球手,喺中國湖北出世。1999年轉打職業賽。佢係第一個打入女單網球世界排名前十嘅中國人,截到2011年3月19號,佢嘅女單排名係第6。

球員生涯[編輯]

李娜係右手揸拍,1997年入咗中國國家網球隊。2002年年尾,因為同隊友姜山拍拖俾國家網球隊反對,李娜決定退役,到2004年年中復出,無耐就入返國家隊。而姜山同李娜喺2006年1月27號結婚。

2006年,李娜打入溫布頓網球公開賽單打八強,創出嗰陣時中國網球單打選手喺網球大滿貫嘅史上最叻戰績。

2009年,李娜正式脫離國家隊,請咗瑞典教練托馬斯·霍格斯太(Thomas Hogstedt)做技術教練。嗰年10月,李娜世界排名升上第15位,平咗中國另一位網球員鄭潔所做嘅中國球手最高嘅世界排名紀錄。

2010年澳洲網球公開賽,李娜同埋鄭潔一齊打咗入四強,雖然各自輸咗畀美國籍嘅沙蓮娜威廉絲同埋比利時籍嘅軒寧,但都憑住呢個成績,平咗中國球員喺大滿貫入便嘅單打最好成績。亦係史上第一次喺大滿貫四強同時出現兩個中國球員。

2011年1月,李娜喺悉尼國際賽打入決賽,而佢嘅對手係攞過好多個大滿貫冠軍,嗰陣時世界排名第三嘅比利時籍克莉絲達絲。李娜喺一開局落後0:5嘅情況下打出一場「驚天大逆轉」,最後以7:5、6:3打贏埸波,攞咗冠軍。之後即刻轉戰澳洲網球公開賽。四強以2比1打贏丹麥籍一姐禾絲妮雅琪,歷史性打入大滿貫賽事嘅決賽,成為第一個打入大滿貫決賽嘅中國同亞洲球手。決賽又係同克莉絲達絲打,但就輸1-2(6:3、3:6、3:6),得亞軍,不過李娜已經攞到咗截至當時亞洲球手喺大滿貫單打賽事入便嘅最好成績。呢場比賽之後,佢嘅世界排名升到第7。

2011年法國網球公開賽,李娜連續第二次打入網球大滿貫賽事嘅女子單打決賽,喺6月4號嘅決賽贏埋衞冕嘅意大利籍、世界排名第五兼賽事五號種子嘅施姬艾禾妮(斯基亞沃內)2-0(6:4、7:6(0))攞到冠軍,成為首個攞到大滿貫女單錦標嘅中國同亞洲球手。

威水史[編輯]

  • 單打最高排名:3(2013年10月28號
  • 雙打最高排名:54(2006年8月28號
  • 網球大滿貫最叻(女單):
    • 澳洲網球公開賽:冠軍2014年
    • 法國網球公開賽:冠軍2011年
    • 溫布頓網球公開賽:八強(2006年、2010年、2013年)
    • 美國網球公開賽:四強(2013年)

[編輯]


連出去[編輯]