李毓芬

李毓芬
模特兒
國籍	中華民國
出世	(1985-05-11) 1985年5月11號 臺灣 臺北市
職業	模特兒、主持人、演員
活躍年代	2009年—

李毓芬（英文：Tia Lee，1985年5月11號—）係華語樂壇女歌手、演員、模特兒，出生於臺灣臺北市。出道時拍攝過風色幻想online、神魔online等網上遊戲嘅廣告。曾經係歌唱組合Dream Girls嘅成員，亦有喺偶像劇演出。除咗演藝同音樂事業，仲會喺各大時裝騷擔任模特兒。

音樂生涯

2010年，李毓芬作為Dream Girls嘅其中一員正式進軍歌壇；2019年發佈咗佢嘅單曲《相信你Believe in You》後，經過咗三年的沉寂期，喺2022年11月，李毓芬發佈咗佢首個動畫系列《再見公主》嘅預告片，重新投入佢嘅音樂同演藝事業。

演藝生涯

2010年，李毓芬同宋米秦、郭雪芙組團 Dream Girls 正式進軍歌壇。

2011年，Dream Girls發行咗首張團體EP《美夢當前》 ；同一年演出咗音樂微電影《Dying For Love》。

2012年，李毓芬演出咗浪漫喜劇《最完美的女孩》。

2013年，李毓芬同林佑威、張熙媛、楊晨連袂演出咗現代都市劇《濤女郎》，之後客串出演咗根據同名韓劇改編嘅現代愛情劇《原來是美男》；喺12月，Dream Girls發行咗首張團體專輯《美麗頭條》，入面收錄咗合唱歌《聽你說》，另外有李毓芬嘅獨唱情歌《我跟她們不一樣》等。

2014年，李毓芬同炎亞演出咗都市愛情劇《愛上兩個我》，呢套劇喺2014年中國電視劇頒獎典禮上獲得「觀眾最喜愛的電視劇獎」。

2015年，李毓芬同林佑威演出科幻偶像劇《來自未來的史密特》；隨後同埋修傑楷、陸明君佢哋合作演出咗現代都市職場劇《迷徒Claire》；同年，佢仲同馬可演出叢林探險電影《請勿靠近》。

2016年，李毓芬加入咗 Sony Music，出咗隻《是我不夠好》Single；同年同張睿家演出咗現代劇情片《最完美的女孩》；7月又演唱歌曲《給它一個家》 ；9月，佢主演嘅懸疑片《請勿靠近》上映 。

2017年，佢發行咗個人單曲《不夠好》，推出後三日內有800幾萬次播放數，拎咗「Hito流行音樂獎」同「Hito MV點擊人氣獎」。

2018年，李毓芬發行個人單曲《早應該》。

2019年，同王柏傑一齊演出嘅公路音樂愛情片《絕世情歌》上映，同年仲發行咗個人單曲《相信你》同MV。

時尚事業

李毓芬曾經係Vogue HK同Rollacoaster等著名時尚雜誌封面嘅常客，仲經常參與各大時裝騷同品牌活動，例如曾經被邀請同品牌Coach一齊參加Vogue紐約時裝週。喺2023年2月，李毓芬又受邀請出席倫敦時裝週等多個頂級品牌嘅時裝騷。李毓芬亦係唯一獲設計師Julien Macdonald 選中嘅藝人。

慈善活動同其他事業

李毓芬長年定期支援一啲動物協會，私底下仲會去基隆流浪犬之家同宜蘭流浪動物中心幫手，例如幫流浪狗沖涼，幫流浪動物度過寒流等等。

此外，李毓芬積極宣揚女權主義，之前曾經發起 #EmpowerHer捐贈項目，提高全球關注一啲以女性為中心嘅慈善組織嘅認識同支持。項目籌到嘅所有錢都捐咗畀指定嘅非營利組織，包括美國Women in Music，仲有歐洲、非洲同美洲的Beats by Girlz、香港嘅Teen's Key和新加坡嘅Daughters of Tomorrow。而李毓芬捐幾多錢，就由YouTube音樂影片《再見公主》嘅瀏覽量而決定。

品牌代言

2019年，李毓芬代言德國品牌凱旋（Triumph），正式以模特身份首次亮相，仲連續三年做凱旋嘅品牌大使。同年代言仙俠類MMO遊戲《美人刹》。

爭議

2022年12月9日，李毓芬喺自己嘅YouTube同微博上出咗佢嘅《再見公主》MV，喺 24 個鐘之後，喺 YouTube 頻道嘅影片點擊率突破 470 萬。10日內YouTube上面嘅瀏覽量達到4,800萬，不過遭到網民質疑以灌水方式造數。