李鄭屋漢墓博物館

出自維基百科,自由嘅百科全書
跳去: 定向搵嘢

座標: 北緯22°20′17.14″東經114°09′36.08″

李鄭屋漢墓博物館正門

李鄭屋漢墓博物館位於香港九龍深水埗,係香港歷史博物館五間分館之一,由康樂及文化事務署管理,當中嘅建築屬於香港法定古蹟

歷史[編輯]

1955年喺李鄭屋邨發現嘅漢墓

1955年8月,香港政府為應付市民對公共房屋嘅需求,計劃響李鄭屋村起徙置大廈。當建築工人喺8月9號進行夷平山坡時,無意發現咗一個東漢墓穴。香港大學中文系系主任林仰山教授(Frederick Sequier Drake,1892-1974)於是帶學生前往研究發掘。據當年嘅老街坊回憶,響漢墓正式出土前,曾經有建築工人用外衣包住古物運離現場(睇1955年8月11號《星島日報》)。參考咗林仰山等考古學家評估後,市政局加建咗鋼筋水泥硬殼,以保護漢墓免受風雨侵蝕。漢墓響1957年由市政局接管及開放畀公眾參觀,墓內嘅出土文物都陳列響漢墓旁嘅展覽館內。1988年12月,李鄭屋漢墓被列為香港法定古蹟

由2005年1月起,為紀念漢墓出土50週年,康樂及文化事務署進行一系列嘅復修工程,包括響墓室頂部加建一個用鐵氟龍物料製成嘅天幕,防止雨水造成嘅滲漏,減低被侵蝕嘅機會,耗資達100萬港元。墓室過去都冇採取過任何措施去保護佢,響1970年代香港嘅教科書所見,當時嘅墓室外圍亦只係一個生滿草嘅小山坡。直到1990年代後期,前市政局先至響外面加建保護設施,並響墓內裝設控制濕度嘅裝置。今日漢墓嘅墓室並唔對外開放,但係市民可以透過墓室門嘅玻璃,一睹呢個建於東漢時期嘅墓穴。

地理[編輯]

根據考古學家響發掘古墓時嘅周圍環境推斷,漢墓起嗰時佢係響海邊,但現時博物館所在嘅山腳處已離開海岸非常遠。即使扣除歷年因填海而增加嘅土地,亦可以察覺到從東漢到末嘅1800年間,從珠江帶來嘅沙泥沉積落嚟嘅結果。

建築[編輯]

李鄭屋漢墓博物館外貌
李鄭屋漢墓

根據考古學家推斷,個墓建於東漢時期。而喺漢墓出土咗67件文物,當中包括最少33件完整文物,例如屋舍模型同各種陶器青銅器等。但係,漢墓裏頭冇發現任何骸骨。

漢墓嘅佈局為「十」字形,一共有四個墓室。墓室屬磚室墓,由長40厘米、闊20厘米同厚5厘米嘅塊砌成,而磚塊刻有10幾種花紋及同文字「大吉番禺」,但室入口道響出土前已受到破壞。

至於個墓嘅主人,有人話係鹽官,亦有意見話係避亂嘅貴族。

展覽[編輯]

漢墓現時已成為康樂及文化事務署嘅一間博物館。由於需要穩定漢墓內嘅溫度濕度,墓室並唔對外開放,但參觀者可透過裝嵌響羨道門口嘅玻璃牆窺探墓室內部,參觀者亦可以睇埋漢墓旁邊嘅展覽館,除咗展出從漢墓出土嘅陶器同青銅器之外,重設有「李鄭屋漢墓」同「華南漢文化」兩個展覽,介紹漢墓嘅地理環境、墓室結構同發現經過,以及漢朝時期嘅嶺南文化

交通[編輯]

延伸閱讀[編輯]

  • 香港歷史博物館編:《李鄭屋漢墓》(該館,2005年10月,ISBN 962-7039-53-5
  • 呂沛銘:《李鄭屋漢墓》,2005年
  • 蕭國健:《香港古代史》,香港中華書局,2001年

睇埋[編輯]

出面網頁[編輯]