林尚義

林尚義（1934年11月7號—2009年4月23號），花名阿叔、重炮手、倉魚，係香港足球員、講波佬，幾受香港老中青球迷嘅愛戴。

阿叔16歲加入咗香港甲組足球隊，1948年開始效力傑志，1958年代表中華民國攞咗亞運足球金牌，1960年喺羅馬參加1960年羅馬奧運會，1972年效力流浪足球隊時攞咗聯賽同銀牌雙料冠軍。1982年攞埋國際足協世界教練文憑。

林尚義喺香港中文大學經濟系畢業之後，警察足球隊曾邀請佢加盟，但佢拒絕咗，重去咗教書。佢曾經喺文理書院 (香港)教體育，社會同國文。

掛靴之後，林尚義先後喺商業電台、亞洲電視同埋無綫電視做講波佬超過成廿年，堪稱香港足球評述界嘅宗師，佢嘅權威式球評風格實在係深入民心。

阿叔曾經喺1995年至2001年期間客串多部電影，好似《黑玫瑰義結金蘭》(1997年)、《賭聖3之無名小子》……等，其中以《古惑仔》電影系列中飾演風趣神父一角最深入民心。亦因為佢獨特嘅講嘢方式，有好多廣告商都搵佢做廣告嘅旁白，好似早排嘅可口可樂廣告：「10號仔一直帶個波衝入禁區……腳趾尾拉篩，入咗啦！入咗啦！」令到好多熱愛足球嘅人聽到都覺得好開心，好有感染力。

2005年初佢老婆劉蕙芳因為肝硬化引致內出血死咗，終年四廿幾。佢大受打擊，試過想喺2005年8月中同無綫合約屆滿之後退休，被無綫挽留，到2006年世界盃後先至宣佈退出電視同電影圈。

2009年4月23號因病響律敦治醫院死咗，享年七十四。