樹熊

出自維基百科,自由嘅百科全書
How to read a taxoboxWikipedia:點樣睇生物分類框
How to read a taxobox
樹熊

瀕危指標
物種分類
動物界
脊索動物門
哺乳綱
下綱 有袋下綱(有袋類
雙門齒目
亞目 (Subordo): 袋熊亞目 Vombatiformes
樹熊科 Phascolarctidae
樹熊屬 Phascolarctos
樹熊P. cinereus
二元學名
Phascolarctos cinereus
Goldfuss1817

樹熊syu6 hung4學名Phascolarctos cinereus),又譯作樹袋熊無尾熊koala粵拼kou6 aa1 laa4)或考拉,係澳洲原住民嘅方言,意思係「唔飲水」咁解,係澳洲特有種生物,全世界只有澳洲東部嘅昆士蘭州新南威爾斯維多利亞省地區低海拔、唔密集嘅桉樹林中。1798年一位探險家喺澳洲布魯山脈首次發現,喺19世紀初樹熊遭到捕殺出口,數量由百萬隻銳減至1000多隻,澳洲政府後嚟立法保護,澳洲嘅樹熊保護區有公立亦有私立,私立嘅羅帕恩公園喺1970年1976年曾經養過白色樹熊。

特徵[編輯]

樹熊身長約 70-80 公分,有大概 10-15 年命,耳仔大細為 5-6 公分,腳板大細 10-16 公分,成年樹熊體重 8-16 公斤,具有一對向前嘅眼,前肢共有五指,其中兩指同其他三指較為分開,型態類似人嘅手,但有兩隻手指公;後肢共有四趾,其中一趾同其他三隻趾分開成九十度角,方便樹熊攀樹木、𢯎aau1痕同梳毛。樹熊乸身上有育兒袋,畀熊仔住。公嘅心口有咖啡色條紋。

食物[編輯]

由於樹熊所居住嘅澳洲嘅森林有好多尤加利樹,樹熊食尤加利葉。因為尤加利葉粗,纖維相當硬,營養又少,因此樹熊每日都要係噉食並𡁻成萬次至攝取到足夠養分,因為每日唔停𡁻,令樹熊老咗會因為牙齒嘅磨損食唔到嘢而餓死。為咗消化尤加利葉中嘅毒素,樹熊嘅消化道盲腸部份有成 200 cm,佔整個消化系統兩成,亦因為尤加利葉有毒,令樹熊冇其他爭食對手,啱啱出世嘅樹熊因為冇牙𡁻唔到尤加利葉,因此會住喺阿媽個袋度六個月,直到牙長出來為止。

行為[編輯]

樹熊屬於夜行動物,身體新陳代謝較慢,每日要瞓 17-20 個鐘。熊仔出世後會住喺媽媽嘅育兒袋,大概半年後至會由呀媽嘅袋之中出來,會食熊乸半消化而痢狀嘅「屎」(pap)[2][3][4]

疾病[編輯]

樹熊容易感染幾種不同疾病,常見嘅兩種好似結膜炎、濕屁股,係種腎臟泌尿系統嘅疾病,其他嘅重有呼吸系統感染、一種頭骨嘅疾病以及寄生蟲等等。而衣原體細菌不時被認為係令樹熊病嘅主要原因,專家正持續研究佢同樹熊族群嘅關係。而可以發現嘅係樹熊喺人群擠擁或者唔夠嘢食嘅地方生活嗰時,會較容易感染疾病。而有關點樣令樹熊受到更好照顧,或者係減少佢哋受到疾病感染及受傷嘅相關研究,一直都進行緊。

天敵[編輯]

樹熊一生有幾種天敵,其中之一係澳洲野狗(Dingoes),當樹熊為咗從一棵樹走到另一棵樹而走落地面時,無論係成年抑或小樹熊,都有可能俾澳洲野狗襲擊;而小樹熊有時都會被楔尾鷹(Wedge-tailed eagles)同貓頭鷹攻擊;其他好似野生嘅以及狐狸,都係樹熊嘅天敵之一。但而家樹熊真正嘅威脅係嚟自人類起道路、交通影響,令樹熊嘅棲息地減少,呢啲亦可以話係另一種形式嘅敵人。

近親[編輯]

樹熊同袋熊具有好多類似嘅特徵,因此佢哋可能係近親,但重需要進一步嘅分子生物學研究。

澳洲南維多利亞省Manna Gum森林裏面嘅樹熊。

繁殖方法[編輯]

雖然並無確實數據,估計澳洲嘅動物園同保育區喺19世紀後期先開始養樹熊。澳洲悉尼嘅塔龍加動物園喺1914年開始養樹熊,喺開園前兩年飼養。第一批空運到塔龍加動物園嘅兩隻樹熊係由樹熊保護區運嚟。

海外嘅動物園就要花更耐時間至開始養樹熊,因為樹熊對食物要求非常高,所以極少有動物園可成功飼養。倫敦動物園喺1880年引入一隻樹熊,但只養到14個月。紐約布隆克斯動物園喺1925年就有一隻樹熊標本,標本係將養咗5日之後因營養不良死咗嘅樹熊而造嘅。美國聖地牙哥動物園喺1925年由塔龍加動物園運咗樹熊,三藩市動物公園喺1959年擁有3隻。

2001年台灣從悉尼動物園運嚟兩隻樹熊。

參考[編輯]

  1. Gordon, G., Menkhorst, P., Robinson, T., Lunney, D., Martin, R. & Ellis, M. (2008). Phascolarctos cinereus. In: IUCN 2008. IUCN Red List of Threatened Species. Downloaded on 2009-01-13.
  2. 無尾熊寶寶吃軟便 全都露,新聞稿,臺北市立動物園
  3. The unbearably gross fact about baby koalas that might ruin them for you forever,nine.co.au,2015
  4. Life cycle of the Koala,The Australian Koala Foundation,2020年搵到

睇埋[編輯]