民建聯

民主建港協進聯盟
主席	譚耀宗
成立	1992年7月10號
總部	香港北角英皇道83號聯合出版大廈15樓
理念	愛國愛港 建設特區、繁榮創富、安居樂業
立法會席	13
黨員數	10,403 （2007年7月）
色	藍、紅
網	dab.org.hk

民主建港協進聯盟（簡稱民建聯，英文：Democratic Alliance for the Betterment and Progress of Hong Kong）係香港政黨，響1992年7月10號成立，係依家香港最大嘅政治組織，亦係香港立法會第一大政黨。

簡史

概述

民建聯原本叫民主建港聯盟，成立時以親北京人士為骨幹。創黨會員中，有香港工會聯合會幹事（包括陳婉嫻、陳鑑林、譚耀宗）、中學老師同校長（曾鈺成、程介南、葉國謙、馬力），而香港特別行政區首任律政司司長梁愛詩亦係佢哋嘅創黨黨員之一。

十年發展

1995年，民建聯第一次派人參選立法局選舉，喺唔少選區都同民主黨直接對壘。喺單議席單票制情況下，成績並唔理想，只贏得2席直選議席同4席功能組別議席。隨後中國政府響1996年設立臨時立法會，重委任民建聯多位成員入臨時立法會，令民建聯響立法機關嘅力量大大增加。由於民建聯嘅親政府作風，畀人泛指為「親政府陣營」、「建制派」、「左派」、「愛國愛港」人士，亦被稱為「保皇黨」。

香港回歸之後，譚耀宗畀行政長官董建華委任加入香港特別行政區行政會議。

1998年，選立法會議員嘅辦法改咗，取消咗彭定康政改方案所設嘅「新九組」，改為其他功能組別；地區直選方面，改用比例代表制，令民建聯長期以嚟整體支持度較低而攞唔到多議席嘅情況改變咗。喺1998年香港立法會選舉入面攞到9席，地方選區五區各取一席。2000年香港立法會選舉入面攞到10席，新界西、九龍東、香港島更攞到兩席，成為香港立法會入面第二大黨，僅次於民主黨。同時喺2000年香港立法會選舉，副主席兼香港島選區名單第一名參選人程介南畀蘋果日報揭發以權謀私，一度使選情逆轉，但最後佢同喺港進聯轉投過嚟嘅蔡素玉雙雙當選，程氏宣佈當選後辭去議席同埋黨職，最後畀廉政公署拉咗，再定罪入獄。

同年年底嘅補選，民建聯候選人鍾樹根以三萬票之差輸畀民主派支持嘅余若薇。

2002年，民建聯主席曾鈺成畀行政長官董建華委任加入行政會議。

創黨以來最嚴重慘敗

由於民建聯支持香港基本法第23條立法，黨主席曾鈺成同中委兼立法會議員陳鑑林響七一遊行嗰日話遊行人士畀人誤導嘅印象深入民心，搞到2003年香港區議會選舉入面大敗，響400個直選議席入面淨係攞到62席。當中，以北角嘅錦屏選區蔡素玉火併「長毛」梁國雄、西環觀龍選區葉國謙對戰何秀蘭等最激烈。呢次選舉失利係民建聯創黨以嚟最嚴重嘅慘敗。選舉失利之後，創會主席曾鈺成辭職，改由當時嘅秘書長，港區全國人大代表馬力喺2003年12月接任。

振作前進

響2004年立法會選舉，民主派選舉協調失當，加上民建聯成功動員，一共贏咗12席，令民建聯成為有最多立法會議席嘅政黨。

2005年2月，民建聯同另一親政府政黨香港協進聯盟（簡稱港進聯）合併，改名做民主建港協進聯盟，簡稱仍然係民建聯。

2007年1月1號，副主席葉國謙話，民建聯會員人數達8,643人，成為香港各黨派中會員人數最多嘅政黨。

2007年8月8號，主席馬力因為結腸癌併發喺廣州病逝，終年55歲。8月28號，民建聯選出譚耀宗為新任主席。

派系

家下係香港第一大政黨，黨員人數超過10,000人，外界一般按民建聯黨員嘅背景而分為以下六大派系：

1. 工聯會，以陳婉嫻為代表
2. 鄉事派，以張學明為代表
3. 福建派，以蔡素玉為代表
4. 前香港協進聯盟成員，以譚惠珠為代表，主要為工商界人物
5. 教聯會派系，左派香港教育工作者聯會系統出身嘅成員，包括頭兩任主席曾鈺成同馬力，以及前副主席程介南、現副主席葉國謙，都係出身自教聯會同左派學校教職員
6. 地方政客，以劉江華為代表

歷任主席

1. 曾鈺成（1992年7月─2003年12月）
2. 馬力（2003年12月─2007年8月8號）
   • （署理）譚耀宗（2007年8月8日─8月28號）
3. 譚耀宗（2007年8月28日─今）

黨內架構

常務委員會

副主席

• 葉國謙（立法會議員）
• 劉江華（立法會議員、公民力量創始人之一）
• 蔣麗芸（生意人、蔣震個女）

秘書長

• 簡志豪（黃大仙區議員）

副秘書長

• 曹王敏賢（前臨立會議員、曹宏威老婆）

司庫

• 黃建源

常務委員

民建聯常務委員

方和	吳仕福（西貢區議會主席）
李慧琼（立法會議員）	林光宇（前民航處處長）
張國鈞（青年民建聯主席）	陳恆鑌（青年民建聯副主席、荃灣區議員）
彭長緯（沙田區議會副主席）	馮培漳（會計師、民建聯培訓委員會主席）
溫悅球（西貢同將軍澳支部主席、西貢區議員）	陳曼琪（律師、黃大仙區議員）
鄧兆棠（前立法會議員、元朗區議會主席）	歐陽士國（生意人）

現任立法會議員

家下民建聯喺立法會一共有13個議席，議員包括

曾鈺成 香港島 黃國健 九龍東（以工聯會名義參選） 陳鑑林 九龍東 李慧琼 九龍西 劉江華 新界東 陳克勤 新界東

譚耀宗 新界西 張學明 新界西 王國興 新界西（以工聯會名義參選） 潘佩璆 勞工界（以工聯會名義參選） 黃容根 漁農界 黃定光 進出口界 葉國謙 區議會界

睇埋

• 香港政治
• 香港協進聯盟（已經同民主建港聯盟合併）

連出去

你可以維基同享呢類嘅媒體資源：
Category:民建聯

• 民主建港協進聯盟