沙面

出自維基百科，自由嘅百科全書

(由沙面島跳轉過來)

跳去: 定向, 搵嘢

沙基涌對岸嘅沙面島

英租界嘅橋

沙面中心花園

沙面（Shameen），又叫沙面島，座落喺中國廣州市荔灣區六二三路嘅對岸，係珠江北岸嘅一個人工小島，地處白鵝潭北邊，同廣州大陸隔住沙基涌相望，面積有差唔多 0.3 平方公里，而家係多個國家駐廣州領事館嘅所在地同喺廣州嘅外籍人士嘅主要活動地方。

[編輯] 史

沙面喺歷史上曾係英、法兩國嘅租界，1860年代第二次鴉片戰爭前後，英法兩國揀中咗呢塊珠江中嘅沙洲仔（距離清朝閉關鎖國時期中國唯一嘅外貿區「廣東十三行」相當之近）作為租界地址，填築成島，並喺1861年簽訂咗租約。島上西邊 3/4 劃為廣州英租界，約 264 畝，東邊 1/4 劃為廣州法租界，約66畝。各有一棟橋同中國大陸（華界）相通。

喺之後嘅大半個世紀入面，英法兩國取得喺沙面島上嘅好多特權，政府相關機構同企業大量咁移入，主要嘅領事館同政治、金融組織都起喺呢度，並喺好長嘅時間入面畀咗附近嘅中國人好多唔公平嘅待遇，沙面因為咁成為後嚟中國乃至附近國家民族解放運動人士抗議同攻擊嘅目標。好似發生喺1920年代嘅廣州市民多次反殖民遊行，同埋越南革命者范鴻泰（Pham Hong Thai）對沙面法國領事館嘅炸彈襲擊等等。

1942年，日本向英國宣戰後，佔領沙面英租界，交咗畀親日嘅汪精衛政權（一般稱「偽國民政府」）。1943年，法國維希政權退出法租界，交咗畀汪精衛政權。嗰一年，堅持抗日嘅重慶國民政府另行同英國訂約收返英租界。二戰結束後，新成立嘅法國戴高樂政府正式宣佈將沙面法租界交返畀中華民國。

1996年，沙面嘅建築群被定做全國重點文物保護單位。

1997年，國務院將沙面列做國家級文物保護區。

[編輯] 現狀

而家，沙面係廣州著名嘅旅遊區、風景區同休閒勝地，亦都係白天鵝賓館嘅所在地。島上嘅綠化較好，有古樹 150 幾樖，空氣清新，環境衛生唔錯，可以講係廣州嘅世外桃源。建築方面，好多都係喺19世紀起嘅，同埋帶有西方風格，基本上都係文物建築。而家嘅美國駐廣州總領事館亦同樣喺沙面島，咁令沙面島上面有唔少外籍人士喺度辦公，而且呢個領事館係美國喺中國唯一可以辦理中國公民移民美國簽證嘅地方。