菠蘿包
(由波羅包跳轉過嚟)
菠蘿包（粵拼: bo1 lo4 baau1），香港之外又叫波羅包、菠蘿麵包，係香港流行嘅一種甜味麵包。因為菠蘿包焗過之後表面金黃色、凹凸脆皮就好似菠蘿咁，就以就有呢個名，所以菠蘿包實際上係冇菠蘿成分。
簡介[編輯]
菠蘿包嘅產生一種講法係因為早年香港人對原來嘅包唔滿足，認為味道唔夠，因此喺包上加上砂糖等甜味餡料而成。菠蘿包外層表面嘅嘅脆皮，一般由砂糖、雞蛋、麵粉同豬油烘製而成，係菠蘿包嘅靈魂，為平凡嘅麵包加上咗口感，以熱食為佳。酥皮要做得香脆甜美，而包身就要軟身先好食。外形亦同日本嘅蜜瓜包（或稱甜瓜包，メロンパン）同香港嘅墨西哥包相似。
香港[編輯]
菠蘿包係香港最普遍嘅麵包之一，差唔多每一間香港嘅餅店（麵包店）都有賣菠蘿包，而唔少茶餐廳同冰室亦有供應。一般作為早餐或點心食用居多。菠蘿包售價亦相當平，一般約港幣3至7不等，深受香港人歡迎。而除咗喺香港外，喺南中國地區亦都好普遍。
菠蘿包由於熱量、脂肪同膽固醇含量較高，曾被香港專家定為「十大不良零食」。
台灣[編輯]
菠蘿喺台灣叫做鳳梨，菠蘿麵包亦即「有住鳳梨表皮嘅麵包」。
喺台灣賣嘅菠蘿麵包同香港兩地嘅不同，而係源自日本蜜瓜包嘅變種。雖然喺外型上同港式菠蘿包相似，但係製作方式同味道並唔一樣。外層嘅脆皮主要由類似餅乾嘅麵糰製作而成。
2011年2月，台北市糕餅公會號召全台糕餅業者投票，結果出爐，菠蘿、蔥花、紅豆、奶酥拿下「四大天王」，堪稱最台嘅麵包，其中菠蘿麵包以壓倒性嘅票數攞到冠軍。
其他變化[編輯]
個別餅店或茶餐廳喺菠蘿包上加上變化，創新、特色嘅口味層出不窮，好似午餐肉菠蘿包、迷你菠蘿包、奶黃菠蘿包、紫菜菠蘿包、朱古力菠蘿包、芝士菠蘿包、椰絲菠蘿包同叉燒菠蘿包、加入生果味道嘅哈密瓜菠蘿包、藍莓菠蘿包、紅豆菠蘿包、士多啤梨菠蘿包等，甚至重有真正有菠蘿蓉或菠蘿片餡料嘅菠蘿菠蘿包。