深水埗
深水埗（讀音：sämp sõy bõw），亦有人寫做深水埔同深水莆，其“埗”本字經考證為“埠”，係香港新九龍一個地方。響大角嘴、石硤尾同長沙灣之間，主要係個商宅混合嘅舊區。深水埗曾經係世界上人口密度最高嘅地方，入過健力士世界紀錄大全。家下深水埗慢慢變成老人同新移民聚居地。
政治上深水埗係屬於深水埗區。
[編輯] 歷史
深水埗可能早喺東漢已經有人住，1955年起緊李鄭屋邨有嗰時發現咗一個東漢（已經成為李鄭屋漢墓博物館）。
深水埗原本係鄉村地方，個位置就響九龍半島西便海邊，大角嘴個半島底西便外則。深水埗可能曾經係上落渡船，因為埗就碼頭咁解，不過資料缺乏，無從稽考。舒懋官嘅重修新安縣志，就有提到『深水莆』係『官富司管屬村庄』。深水埗條村，南便係大角嘴半島，北面係突出嘅海角，直至涌口。過咗條涌有菴由（Om Yam）、元洲同田寮。而東面就有塘尾。
大清1860年割九龍半島畀英國，深水埗坐正喺邊界上面。到1880年大角嘴南面外側起咗大同船塢。深水埗好自然就住咗好多工人，尤其係大清境內，裏面就好似村落咁，唔係有規劃發展。
1898年，英國又響大清手上租埋新界，首先就起條大埔道通去新界東，再起多條青山道去新界西。香港政府對原清界雜亂無章嘅深水埗，就諗住填海同規劃發展。1924年之前，個海角，連帶菴由，同埋菴由個涌口同海灣，已經開成一個正正方方小鎮。西北邊海皮係欽州街，西南邊海皮係通州街，東南邊係黃竹街，東北邊係鴨寮街。元洲、田寮同塘尾三條村就響界外。嗰陣個鎮裏面已經有荔枝角道，就證明呢陣時，政府就諗住將深水埗同荔枝角之間，成個海灣填平。不過之後，都將個塊填地四四方方咁拉長到東沙島街咁遠，其餘要到1950年代之後先成事。呢塊新填地就大部份都用咗呢做英軍營盤，家下重有條營盤街做證。1924年，深水埗警署亦都埋響軍營隔籬，欽州街同荔枝角道口。
深水埗啲樓就向大埔道，向長沙灣沿岸平地發展，深水埗各村亦都消失響城市發展。
[編輯] 地理
家下深水埗同石硤尾之間，以大埔道為界，而界限街以南，就歸大角嘴。至於東面，深水埗同長沙灣，因為係填海嘅關係，市係深水埗伸入長沙灣，而海同地原本就係長沙灣，所以就無一條明顯嘅界。欽州街到東京街一帶，係兩個地方嘅交接地帶。1990年代，因為要落實玫瑰園計劃，深水埗又再大規模填海，南昌邨、南昌公園同通州街公園就當係深水埗。富昌邨同對出就當入長沙灣。而其餘就當係大角嘴。所以深水埗變成同海絕緣。
家下深水埗地方，原本就一片沖積平地。沙泥係石硤尾對上個山流落來幾條涌帶落來。呢啲涌，響發展過程中，就變成家下南昌街同東京街兩條渠。不過後尾大幅發展，兩條渠實在唔夠疏水使。每逢大雨，呢區都有機會水浸。不過隨住渠務工程展開，深水埗就好少話水浸。
