燒豬

出自維基百科,自由嘅百科全書
(由燒肉跳轉過嚟)
  「燒肉」跳轉到呢度。有關其他用法,請睇「燒肉 (搞清楚)」。
燒豬
斬燒豬
燒臘舖掛起嘅燒肉
燒腩仔

燒豬係一種廣東傳統嘢食。製法同另一廣東燒味燒乳豬基本上一樣,唔同嘅係會用已經長大嘅,而唔係用乳豬。燒豬嘅其他多骨部份,例如頭、踭等,都可以用嚟熬湯或煮粥。

廣東燒味可以分為燒肉燒腩,燒肉係將成隻生豬燒製而成,之後再斬成細件[1];燒腩係淨係燒大豬嘅五花腩部份,會先將腩肉本身嘅肋骨起出,食嗰陣只有脆皮、嫩肉同肥膏,食得比較方便[2]。而細件嘅燒腩就叫燒腩仔。另外,作為被再度烹調嘅食材就叫火腩(例如「豆腐火腩」)。

燒肉以皮脆肉嫩為上品。燒豬可以重十到二十公斤,燒肉無論係脂肪同肉都較多而厚。而燒乳豬一般只重五至六公斤,除咗一層脆皮之外,只有好少嘅脂肪同肉,而且骨軟都食得。燒乳豬嘅每斤價格亦比燒肉貴好多;多數賣燒味嘅舖頭通常都會有燒肉賣,但係乳豬就未必成日會有,通常需要先預訂。

製法[編輯]

燒豬一般嘅製法係將豬劏好之後喺肚度切開,放入特製燒烤叉撐開,然後澆上熱水令豬皮收縮。燒烤可以係逐隻放喺火上面燒,亦可掛入烤爐烤成。燒烤嗰陣要喺豬皮上面拮啲窿仔,等皮下嘅油流出。亦可以用猛火燒烤,其間喺豬皮搽上油,令豬皮成充滿氣泡,酥脆嘅金黃色,就會成為「麻皮豬」(臺稱脆皮燒肉)。

睇埋[編輯]

參考[編輯]

  1. 腩VS沙梨篤VS不見天肉有三大部位 教你點樣買得精明. 原著喺2020年3月28號歸檔. 喺2019年6月6號搵到.
  2. 熱燒豬腩仔篇 . 原著喺2020年3月28號歸檔. 喺2019年6月6號搵到.