狄波拉

狄波拉（Deborah Lee，1951年 10月27號—），原名李敏儀，又名李嬙，係香港女演員，選美出身。狄波拉個名來自佢個英文名Deborah^[2]。

生平[編輯]

狄波拉籍貫江蘇無錫，父母係上海人，1951年10月27號香港出世，響一間女校畢業。不過佢個仔謝霆鋒響《鋒味第二季》第十集話狄波拉其實響泰國出世，係個孤兒仔，後嚟畀嚟自上海嘅養父領養^[3]。

1973年喺香港「東方選美會」中勝出，跟住代表香港參加喺菲律賓馬尼拉舉行嘅「亞洲小姐」選舉^[2]。1974年2月又參加「太平洋皇后」選美會。

之後，佢加入麗的電視（亞洲電視前身）主持電視節目《麗視滿香江》。1974年加入嘉禾做電影演員。1975年入香港無綫電視演《歡樂今宵》。1976年演無綫長劇《狂潮》而走紅。80年代初，狄波拉開始出演棟篤笑。

響舉家移民加拿大後，狄波拉開始淡出娛樂圈。90年代息影，最收尾演出嘅作品係1993年嘅《情天霹靂之下集大結局》。

1979年佢同謝賢結婚，生咗一仔一女，即係謝霆鋒同謝婷婷。香港前途談判期間，夫婦成家齊齊移民加拿大溫哥華。之後，狄波拉同謝賢離婚。2000年，喺新加坡同機師江耀城（綽號鬍鬚Kong）註冊結婚。