孫中山紀念館 (香港)

孫中山紀念館

孫中山紀念館（英文：Dr. Sun Yat-sen Museum）位於香港中環衛城道7號，前身係香港富商何東細佬何甘棠嘅屋企甘棠第。紀念館係香港歷史博物館嘅第四間分館，介紹中華民國國父孫中山嘅生平以及佢同香港嘅關係。紀念館喺2006年 12月12號正式開幕，以紀念孫中山先生出世140周年。

歷史 [編輯]

正喺度修葺嘅孫中山紀念館（2006年6月）

衛城道入口刻有甘棠第嘅中、英文名同埋建築年份

重修後嘅孫中山紀念館，有金飾嘅陽台欄杆

甘棠第喺1914年起好，個名係以業主何甘棠嚟命名。何甘棠一直喺呢度住，直到終老（1950年）。1960年，甘棠第賣咗畀鄭氏家族，之後鄭氏又賣畀耶穌基督後期聖徒教會，甘棠第自此成為教會聚會嘅地方。1990年，甘棠第俾古物諮詢委員會列作二級歷史建築。

2002年10月，教會向香港政府建築事務監督申請將甘棠第拆卸重建，市民同民間團體曾經舉行活動希望保留呢座建築物；2004年2月，香港政府用5,300萬港元同教會買甘棠第，並且用9100萬港元進行修葺，改建做孫中山紀念館。

甘棠第起喺斜坡上面，樓高4層，總樓面面積19,672平方呎，屬於英皇愛德華式古典建築風格。外牆就係用紅磚同埋花崗岩砌成，一、二樓都有個弧形露台，用希臘式巨柱承托，樓房設有前、後樓梯，以前前樓梯係畀主人何氏家族用，而後樓梯就畀工人用嘅。

2006年12月5日至到2007年 3月31日期間，市民可以透過城市電腦售票網預購入場卷。入場卷有效期係7日，入場時間分別係上晝10點、上晝11點半、晏晝1點、晏晝2點半同埋晏晝4點。星期日同公眾假期加開晏晝5點半。