田稗嘅比喻

出自維基百科,自由嘅百科全書

田稗嘅比喻係耶穌講嘅一個比喻,記載喺《新約聖經》《馬太福音》第13章第24至30、36至43節。

聖經譯文[編輯]

耶穌向佢哋講另一個比喻,話:「天國好比人撒好種喺佢嘅田度。夜晚,喺人瞓覺嘅時候,有仇敵來,將啲稗撒喺小麥度就走咗。到小麥長大結穗嘅時候,稗亦出現。田主嘅僕人前來話:『主人,你唔係撒好種喺田度咩?呢啲稗究竟喺邊度嚟架?』主人答佢哋話:『呢啲係仇敵做嘅。』僕人就問:『你使唔使我哋去抆走啲稗呀?』主人話:『唔好,因為我驚你哋抆走啲稗嘅時候,會將小麥連根都抆埋出嚟。尤得小麥同稗一齊生啦,當收割嘅時候,我會吩咐收割嘅工人先抆起啲稗,紥起嚟燒,然後將小麥收喺我嘅倉度。』」

耶穌離開群眾,入咗屋度。佢嘅門徒又問佢:「請話我哋知,田稗嘅比喻係乜嘢意思?」耶穌答話:「撒好種嘅就係人子,田地就係世界,好種係屬於天國嘅人,撒稗嘅仇敵就係魔鬼,收割嘅時候就係世代嘅終結,收割嘅人就係天使。到末日,作惡嘅人要好似稗一樣噉抆出嚟,俾火焚燒,人子要差遣佢嘅使者,將一切令人跌倒嘅同作惡嘅喺佢嘅國度揀出嚟,丟入火爐,喺嗰度要喊,咬牙切齒。嗰陣時,義人要喺佢哋父嘅國度發出光輝,好似太陽一樣。有耳可聽嘅,就應當聽!」

——《馬太福音》第13章第24至30、36至43節

解釋[編輯]

稗又名毒麥,屬於一年生疏葉草本植物,穗狀花序長10-15毫米,較小麥長,小穗單生冇柄。稗嘅穀粒經常會受到寄生菌感染而含有毒麥鹼,牲畜食咗會中毒。毒麥一旦受到真菌感染,產生毒性極強嘅鹼,所以穀粒同小麥穗混雜咗,磨成麵粉造餅,人食咗都會中毒。

農田嘅主人所撒嘅係好種子,係揀選過最優質嘅種子,點知主人嘅仇敵卻趁住黑夜破壞,仇敵唔能夠將好種喺田裏面攞走,於是就將稗撒喺小麥裏面。

耶穌親自解釋呢個比喻,撒稗嘅就係仇敵魔鬼,好種就係天國之子,田地就係世界,撒好種嘅就係人子,上帝喺呢個世界度從千萬人之中揀選好多屬於自己嘅子民,學習遵行上帝嘅旨意,活出上帝嘅形象同樣式,事奉上帝同敬畏佢。不過魔鬼同時亦都好努力噉,一啲都唔放鬆積極揀選跟隨佢嘅人,就係嗰啲故意唔認識上帝嘅人。

稗同小麥喺生長初期非常相似,完全唔能夠分辨真假,到咗吐穗嘅時候,先至可以分得出。所以田主嘅僕人問主人:「主人,你唔係撒好種喺田度咩?呢啲稗究竟喺邊度嚟架?」僕人嘅自然反應就係要即刻抆走啲稗,因為若果小麥同稗一齊生長,肯定會影響小麥嘅產量。主人卻顯出更大嘅智慧,容許佢哋繼續生長,因為喺收割嘅日子,稗一定會抆出嚟,紥起嚟燒,小麥就要收喺倉度[1]

參考[編輯]