白糖糕

出自維基百科,自由嘅百科全書
白糖糕

白糖糕,又叫倫教糕(有時搞錯做倫敦糕)、倫滘糕,係中國廣東珠江三角洲白米白糖製成嘅傳統小食[1]

歷史[編輯]

白糖糕始創於明朝順德倫教(古時叫倫滘)嘅一個姓梁小販,據講佢有一次喺蒸鬆糕嗰陣失手,令到粉質下墜,不過蒸出來嘅效果反而大受歡迎,個個食過都認為呢種新小食質地爽滑。後來,佢改用白糖整糕,令到蒸出來嘅糕顏色更加晶瑩潔白,食客叫佢做「倫教糕」,後來又叫「白糖糕」[2]。 由於「倫教」同「倫敦」字型相似,所以有啲人會將佢搞錯做「倫敦糕」。

特色[編輯]

傳統上,正宗嘅倫教白糖糕係唔酸嘅,同時要晶瑩、清甜、彈牙、爽口。如帶有酸味嘅,可能係發酵時間太耐,或加醋防止變壞,或已經變壞。

制法[編輯]

材料:白米半斤(250克)、糖半斤、酵母粉兩茶匙、水三杯。

做法:

  1. 將米洗淨,浸水三個鐘,瀝乾水份後可用石磨或攪拌機加入一杯清水,打成米漿待用
  2. 將糖倒入兩杯清水中,等到糖溶掉同滾起後,就將糖水沖入米漿內,並即刻攪勻
  3. 酵母粉倒入一杯半暖水內拌勻,等五分鐘
  4. 等到米漿(已加糖水)冷卻後,倒入酵母粉連水,略為攪拌後冚上濕布或保鮮紙,等五至六分鐘
  5. 於大鍋內燒水到水滾,放上蒸籠,喺蒸籠內放上濕白布,再倒入米漿
  6. 冚上蒸籠,喺蒸籠旁邊圍上濕布,避免蒸氣外泄
  7. 蒸大概三十分鐘後就可以拎出來,攤凍後就可以切件食用
  • 盡量使用蒸籠蒸糖,唔好用碟,用碟會令糕中嘅水氣揮發唔到,蒸出來嘅糖會好笠。

變種[編輯]

除咗原來味道嘅白糖糕,重有用黃糖做嘅同用雞蛋煎嘅[3]

有越式白糖糕(bánh bò)。

睇埋[編輯]

參考[編輯]

  1. 廣東小吃-倫教糕,新華網
  2. 倫教糕 互聯網檔案館歸檔,歸檔日期2014年7月15號,.,南方網
  3. .