票站調查
出自維基百科，自由嘅百科全書
票站調查（Exit Poll）即係喺選舉票站出口，見到啲人一投完票出嚟，即刻做對投票結果訪問嘅一種民意測驗。喺外國，進行調查嘅機構通常受聘報章或電子傳媒，方便佢哋喺點票結果公布前，盡早估算投票結果，因為某啲地方點票可能要幾個鐘頭甚至幾日先至完成。票站調查另一個主要目的，係為咗可以分析同解讀選民嘅投票行為，立即知道選舉民情同形勢。所以，世界上好多學者都會同組織合作做票站調查，同埋分析有關嘅數據[1]。
目錄 |
[編輯] 功能
由於投票係匿名進行，唯一可以知道選民投票原因嘅方法，就係透過票站調查搜集數據。
響世界好多地方，票站調查被用作為檢驗有冇選舉舞弊嘅其中一個指標。例子有2004年委內瑞拉公投、2004年烏克蘭總統選舉同2004年美國總統選舉。
[編輯] 誤差
好似其他民意調查咁，票站調查一樣會有「誤差」。哩方面，最出名嘅案例係1992年英國國會大選。當時兩個票站調查都推算，選舉結果將會令國會內無一個政黨可以取得過半議席嘅情況，但係實際點票結果顯示，馬卓安領導嘅保守黨政府雖然議席大減，但係仍要些徵少數可以獨自組成多數派政府。
票站調查嘅一個票害係因為有選取調查對像時會有偏差。雖然一般嚟講，票站調查訪問嘅人數比民意調查更多，但係始終只係所有選民嘅一小部份。由於調查機構多數由傳媒贊助，而傳媒往往希望可以喺投票結束後第一時間公布投票嘅推算結果，調查機構唯有響投票結束前幾小時停止搜集數據以爭取時間整理推算，所以冇將投票最後一段時間計算在內，容易出現偏差。因為某啲選民，好似阿婆阿伯同師奶，比較鍾意響朝早投票，佢哋嘅意向可能會響票站中畀人不成比例咁放大咗。相反，晏啲投票嘅人就會畀忽略。同時，選民願唔願接受訪問，以及會唔會如實咁講出自己嘅投票選擇，亦都會左右誤差幅度。
為咗減少誤差，過去有調查機構透過 "pooling" 方式，將各自搜集到的數據共同享用，以增加準確度。響2005年英國大選，英國廣播公司同獨立電視ITV就透過哩種方式，預測英國工黨響大選中贏得 66 席，脗合後來官方公布嘅選舉結果。響2007年澳洲大選，澳洲多間傳媒機構亦透過共享數據方式，準確預測到澳洲工黨以百分之五十三嘅得票率擊敗執政聯盟。
[編輯] 爭議
以往，有唔少批評指票站調查嘅結果若果係投票結束前披露，會影響選舉結果。就以1980年美國總統選舉為例，NBC電視台響美國東岸時間晚上八點十五分，根據同二萬人做嘅票站調查，就宣稱共和黨總統候選人朗奴．列根會勝出。因為當時響美國西岸，時間係下晝五點十五分，投票重未完，所以有人質疑披露票站調查數據影響咗選舉結果[2]另外，響2004年美國總統大選，亦有人喺投票結束前，透過互聯網披露票站調查結果，重一度預言民主黨總統候選人克里會贏[3][4]。
[編輯] 規管
英國、加拿大同澳洲維多利亞省等地方，都將喺投票結束前公布票站調查結果列為刑事罪行，違反者可被罰款甚至監禁[5]。某啲國家，好似新加坡咁，就直頭立法禁止發布票站調查結果[6]。
[編輯] 香港概況
由1991年立法局首次進行分區直選開始，就有人響香港舉行嘅選舉做票站調查，當中以香港大學民意研究計劃最出名。2004年，選舉管理委員會為咗增加票站調查機構嘅透明度，公布全部報請進行票站調查機構嘅機構名稱同工作人員姓名，外界先至可以掌握票站調查機構嘅情況。
2004年立法會選舉期間，一共有七間機構做票站調查，分別係香港大學民意調查計劃、香港大學學生研究隊、香港政策研究所、荃灣青年議會、香港社會及經濟研究所、香港青年協進會和公共事務研究學會。根據香港大學民意研究計劃鍾庭耀博士嘅統計，哩七個機構所調查嘅範圍同動用嘅人力資源如下[7]：
| 港大民意研究計劃 | 港大學生研究隊 | 香港政策研究所 | 荃灣青年議會 | 香港社會及經濟研究所 | 香港青年協進會 | 公共事務研究學會 | ||
|---|---|---|---|---|---|---|---|---|
| 香港島 | 票站數目 | 20 | 7 | 5 | 0 | 33 | 0 | 0 |
| 九龍東 | 票站數目 | 16 | 5 | 6 | 0 | 7 | 13 | 0 |
| 九龍西 | 票站數目 | 13 | 4 | 2 | 0 | 0 | 14 | 0 |
| 新界東 | 票站數目 | 24 | 10 | 13 | 0 | 0 | 0 | 118 |
| 新界西 | 票站數目 | 28 | 5 | 4 | 9 | 0 | 0 | 121 |
| 合計 | 票站數目 | 101 | 31 | 30 | 9 | 40 | 27 | 239 |
2007年區議會選舉，進行票站調查嘅機構，包括香港大學民意研究計劃、香港社會監察、香港發展研究學會、香港社區研究中心、社區研究學會、社會事務調查協會同香港選舉策略研究社等:
| 調查機構 | 票站數目 | 涉及區域 |
|---|---|---|
| 社會事務調查協會 | 112 | 大埔、荃灣、屯門、葵青 |
| 香港社區研究中心 | 99 | 北區、西貢、沙田 |
| 香港調查研究中心 | 76 | 中西區、灣仔、東區、南區 |
| 香港發展研究學會 | 53 | 油尖旺、深水埗、九龍城、黃大仙、觀塘 |
| 社區研究協會 | 35 | 元朗、離島 |
| 香港大學 | 17 | 15個選區 |
| 香港社會監察 | 10 | 黃大仙、觀塘 |
| 香港選舉策略研究社 | 6 | 南區 |
| 香港中文大學 | 2 | 石漁及大埔墟 |
| 香港職業技能專科學校 | 1 | 南昌南 |
| 明愛徐誠斌學院 | 1 | 坪石 |
| 天北居民服務處協會 | 1 | 宏景 |
響2007年12月，立法會港島區補選中，進行票站調查機構包括：香港調查研究中心、香港大學、香港選舉策略研究社同香港社區發展網絡。
| 調查機構 | 票站數目 |
|---|---|
| 香港調查研究中心 | 96 |
| 香港大學 | 41 |
| 香港選舉策略研究社 | 6 |
| 香港社區發展網絡 | 4 |
響2008年立法會選舉，有以下調查機構做票站調查[8]：
| 港大民意研究計劃 | 香港調查研究中心 | 香港研究協會 | 香港社區研究中心 | 社區研究協會 | 萬國宣道浸信會盛恩基督教社會服務中心 | ||
|---|---|---|---|---|---|---|---|
| 香港島 | 票站數目 | 36 | 76 | 31 | 0 | 0 | 0 |
| 九龍東 | 票站數目 | 22 | 0 | 40 | 0 | 0 | 0 |
| 九龍西 | 票站數目 | 28 | 0 | 47 | 0 | 0 | 0 |
| 新界東 | 票站數目 | 49 | 0 | 40 | 19 | 90 | 0 |
| 新界西 | 票站數目 | 50 | 0 | 42 | 110 | 22 | 2 |
| 合計 | 票站數目 | 185 | 76 | 200 | 129 | 112 | 2 |
各個調查機構嘅負責人分別係鍾庭耀（港大民意調查計劃）、吳文濤（香港調查研究中心）、麥燕薇（香港研究協會）、新 界 社 團 聯 會 元 朗 地 區 委 員 會 成 員胡春月[9]（香港社區研究中心）、劉淑雯（社區研究協會）……。
[編輯] 參考
- ↑ 選舉民意調查與傳媒專業操守
- ↑ Facts on File Yearbook 1980 p.865
- ↑ Websites predict Kerry win
- ↑ Mucho flattering to Kerry
- ↑ 《選定地方對票站調查的規管》，第11頁
- ↑ Parliamentary Elections Act, 2001
- ↑ 立法會選舉票站調查分析系列之七
- ↑ 2008年立法會選舉票站調查
- ↑ 六個票站調查三個左派
