竹升（或者竹昇）原本即係「竹竿」咁解，因為「竿」讀音好似「降」一樣，唔好意頭所以要避忌。
竹升亦都係指喺西方國家出世啲華人，因為竹竿係空心嘅，比喻佢哋個心冇中華文化嘅思維。男仔叫竹升仔，女仔叫竹升妹。中國大陸就叫佢哋做香蕉人，因為佢哋外面係黃色嘅，但係入便就係白色嘅。
佢哋自細就受西方文化影響，唔多識中華文化，未必識講或寫中文。諷刺嘅係，外國青年會認為佢哋唔係自己友，好少會同佢哋做朋友，但同喺大中華地區出世後先至移民當地嘅華人思維方式又唔同，一樣唔易同佢哋做朋友。呢種兩頭都唔通嘅情況，亦係「竹升」嘅解釋，因為竹有節，喺節嘅中間，就兩頭都唔通喇。
