篤背脊

篤背脊係香港人好常用嘅形容詞，佢嘅意思其實好明顯，即係唔知情咁俾人喺背後指指點點，搞小動作陷害，而絕大多數係指講壞話嘅意思，可以話係損人利己嘅典型行為之一。佢嘅同義詞係「打小報告」、「放暗箭」，另外相類似嘅詞語有：「做二五仔」、「做鬼頭仔」。

本字寫作椓背脊，《左傳·哀公十七年》：「衛侯辭以難，大子又使椓之。」椓本來指敲擊，又用作告發。

利益因素

篤背脊只會出現喺人類社會入面，因為人與人之間好多時會有利益衝突，為咗鞏固自己利益、地位，尤其係喺工作嘅場合裡面，用呢種行為嚟自保嘅例子實在係屢見不鮮：例如有人想升做某個高職位，點知另一位同事嘅升職機會高過佢，於是即刻搵機會喺上司面前講呢個同事嘅壞話，希望咁樣減低上司對佢嘅信任，增加自己升職嘅機會率。又或者一個團隊合作做一件工作，點知單嘢做衰咗，其中有人為咗唔想成為頂罪嘅一份子，於是就向上頭報告話其實係邊個邊個出嘅主意，自己只係跟方案去做，實行將自己置身事外，免受刑責。

道德問題

正所謂明人不做暗事，一個人喺某人嘅背後指指點點講壞話，可以話係屬於偷雞摸狗嘅鬼祟行為。喺當事人唔知情嘅情況之下，向第二啲人講壞話、打小報告，而呢啲聽小報告嘅人，大多重會係當事人嘅上司、老闆、合夥人、老婆…等，總之能夠遏制或者壓抑當事人，影響到當事人未來或者好重要嘅身邊人，務求阻礙當事人嘅前途／人際關係／夫妻關係，而做呢啲行為嘅人，好多時就係為咗可以藉住當事人嘅低沉而乘機得到好處，損人而利己。

觀感角度

不過有啲人會本末倒置，但凡係有人向其他人報告自己犯錯就話佢打小報告、篤背脊。其實若果有人覺得一件事係向緊錯誤嘅方向去嘅時候，向可以控制局面嘅人反映事實嚟到避免事情一錯再錯，咁就唔可以話佢係篤背脊，因為呢個人並冇自己嘅個人利益，而係為團隊為大局着想；就好似有好多國家嘅紀律部隊入面，如果有隊員覺得做隊長嘅行為係危害緊大家嘅安全，係有權向更上級報告，或者引用國家憲法賦予嘅權力嚟免除佢嘅隊長職務；當然喺嗰位隊長嘅眼中，有人令到自己免職，甚至會孭上刑責，就會覺得係俾人篤背脊陷害。