米芝蓮指南係一本飲食指南，教人去邊處有好嘢食嘅餐廳。米芝蓮以前由賣車軚出身，收尾兼埋出車主指南書仔，教人有關車輛嘅常識，好似架車壞咗點樣自己整，去到世界各地邊度有拖車公司，搵嘢食邊度有食肆咁。
收尾原來佢本飲食指南好多人當咗係世界權威，榜上有名嘅餐廳老闆會好開心，重有個落榜嘅廚師傷心到要自殺。
榜上有名嘅香港食肆包括國際金融中心利苑酒家、中環鏞記酒家、灣仔福臨門、銅鑼灣富臨咁。
書上面除咗有星級食府，重有標誌有一碗麵嘅粥粉麵飯鋪頭，好似中環麥奀雲吞麵世家、沾仔記咁，都嚮書上面搵到。
