粵字
出自維基百科，自由嘅百科全書
(由粵語字跳轉過來)
粵字，即係粵語字，又叫做「廣東字」或「香港字」，係種中文字，用來寫粵語；例如【啲】、【喺】、【乜】、【嘢】、【佢】、【邨】、【攰】、【嘅】、【咋】、【哋】。
目錄 |
種類 [編輯]
粵字有幾種：
造字 [編輯]
根據粵語詞嘅發音同埋意思，遵守六書造出嚟。例如：粵語表示『升降機』嘅詞音 lip1，音譯自英文 “lift”。為咗寫出呢個音，就用形聲法造字，用「車」字做部首，加個「立」字創造出【𨋢】字，意思係上下直立行駛嘅車。又好似【冇】呢個字，係將【有】字嘅兩畫搣走，去表示有嘅相反。
古字 [編輯]
又叫本字，係古漢字，喺而家書面語已經唔再用。例如：表示「疲倦」、「累」嘅【攰】字。
借音字 [編輯]
借用同音漢字嚟寫某個發音。借用嘅字增加咗一個同原義唔同嘅解釋。例如：【響】，借音之後增加咗「在、喺」噉樣一個表示處所嘅解釋。又例如：聽日嘅「聽」字亦係借音字，【聽】原意係用耳仔去感受聲音，而新嘅意思係「遞時、之後」。
香港增補字 [編輯]
粵字喺最初中文字電腦化嘅時候，無加入編碼裏面。響 1999年9月香港特別行政區政府將 4,702 個香港通用嘅中文字造成《香港增補字符集》。Unicode 出 3.1 版嘅時候（2001年5月1號），《香港增補字符集》亦加埋入去。
