精英大師

精英大師（Silent Witness），係一隻香港賽馬馬匹，喺2002到2005年間，曾經17連勝因而成為香港短途馬王。

簡歷

精英大師係一隻澳洲馬，1999年10月1號出世， 2002年12月26號第一次出戰沙田馬場一千米賽事，就已經跑第一，而且全程唔使鞭。2005年4月24號，當佢喺一場本地二級賽1400米贏咗女皇銀禧紀念盃冠軍之後，就打破咗美國九十年代馬王「雪茄」嘅16連勝紀錄，而以連續17場跑第一成為短途馬王。

不過喺2005年5月14號，精英大師第一次跑千六米冠軍一哩賽，結果俾牛精福星以短馬頭位破咗佢連勝紀錄。

而之後喺2005年6月5號參加日本安田紀念賽千六米賽事，喺日本東京競馬場入面，佢亦只係屈居第三。

喺同年10月2號，精英大師同另一匹香港馬好望角一齊出戰日本短途錦標，喺日本中山競馬場，終於贏返第一，係佢第一次喺海外勝出。始終短途先係精英大師嘅世界。

短途錦標系列

喺2003年至2004年期間，精英大師包辦晒洋紫荊短途錦標、百週年紀念短途盃同埋主席短途獎（合共六場本地一級賽），係首匹可以兩度包辦短途錦標系列三關頭馬嘅馬。

之但係喺2006年2月26號，精英大師試圖衞冕第三次香港短途馬，但喺百週年紀念短途盃只係跑第七，令好多人失望，同年3月26號喺主席短途獎跑第三，4月15號嘅女皇銀禧紀念盃跑第二。

健康問題

其實精英大師自從喺日本中山競馬場參加完日本短途錦標之後，佢嘅健康問題已經成為馬迷討論焦點，好多人認為佢已經再跑唔返，雖然間唔中都有啲迴光返照嘅情況，例如喺2006年4月15號女皇銀禧紀念盃入面，喺好多人睇淡嘅情況之下跑第二，但之後喺5月9號挑戰冠軍一哩賽，就得第九。

自從贏咗日本短途錦標之後，佢已經好耐冇跑過第一，而好多人都認為係同佢健康有關，而精英大師嘅健康問題亦令馬迷關心。

經馬會首席獸醫確認精英大師嘅後蹄球節骨有磨損同埋發炎情況。

退役

由於關節衰退，馬主施雅治伉儷同練馬師告東尼商量過之後，認為對於一隻七歲馬嚟講，呢啲關節問題嘅影響可以好大，為咗唔想佢咁辛苦，所以決定精英大師喺2007年2月4號跑埋場百週年紀念短途盃之後宣佈退役。

但佢最後一役只係跑尾二，雖然係咁，但喺佢行沙圈¹時，全場馬迷都為精英大師呢場最後一役歡呼同拍掌，馬主施雅治重感動到當場喊咗出嚟。

退役之後，精英大師將會運去澳洲墨爾本市外一個專為各地馬王而設嘅Living Legends牧場頤養天年。而馬會亦喺2007年2月25號為佢舉行退役儀式，並最後一次踏足沙田草地。係首匹可以行入賽道嘅退役馬。

倒貼賠率

由於精英大師喺短途賽嘅成績幾乎係無敵，令佢每次出賽都成為大熱門，獨贏賠率試過去到最低嘅10.5蚊，可以話中咗都蝕水，而由於太多人中，亦令馬會蝕水130萬。

不過由於精英大師嘅名氣，馬會亦唔介意蝕水，當係宣傳都好，事實上馬會亦成日用精英大師嚟宣傳，當有精英大師出賽，馬會都會大賣廣告，甚至喺廣告入面話：「精英大師威，即係香港人威」。又為佢起咗個網站，令佢成為香港第一匹有網站嘅馬。亦因為咁，鄭中基就有一首單曲係唱好精英大師，叫做《精英》。

2009年11月，為咗慶祝香港賽馬會125周年會慶，精英大師嘅銅像特登被放喺沙田馬場嘅公眾棚廣場，之後永遠擺喺嗰度。

馬匹資料

馬主：施雅治、費葆奇、施冠駒同埋Teresa Marie da Silva

血統

精英大師血統表
Sire El Moxie 1986　馬匹毛色：鹿毛	Conquistador Cielo 1979　鹿毛	Mr.Prospector	Raise a Native
			Gold Digger
		K.D.Princess	Bold Commander
			*Tammy's Turn
	Raise the Standard 1978　鹿毛	Hoist the Flag	Tom Rolfe
			Wavy Navy
		Natalma	Native Dancer
			Almahmoud
Dam Jade Tiara 1993　馬匹毛色：鹿毛	Bureaucracy 1987　黑鹿毛	Lord Ballina	Bletchngly
			Sunset Girl
		Tulla Doll	Oncidium
			Doll
	Jade-Amanda 1986　馬匹毛色：栗毛	Grosvenor	Sir Tristram
			My Tricia
		Comptroller	Sumuggler
			Shifnal's Pride F.13-a

註

• 註 1: 喺每場比賽前馬匹都會喺沙圈踱步畀馬迷睇。沙圈喺馬會官式叫法應該係「亮相圈」，不過呢個叫法只用喺馬會官方嘅印刷品同網頁上，連電視評馬人同馬經都一樣將「亮相圈」叫做「沙圈」。

相關網頁

• 精英大師官方網站
• 精英大師資料（馬會網頁）