絲襪奶茶

出自維基百科,自由嘅百科全書
跳去: 定向搵嘢
絲襪奶茶
凍奶茶
冰鎮奶茶

絲襪奶茶係具有香港特色嘅一種奶茶,係香港人日常下午茶(同早餐)常見嘅嘢飲。基本上,喺香港茶餐廳供應嘅奶茶都係用「絲襪奶茶」嘅方式泡製。

起源[編輯]

由英國開始喺香港嘅殖民統治,英國人就將「下午茶」呢個概念帶到香港。同一般華人喺朝早飲茶嘅習慣唔同:西方人習慣喺下晏三點左右,食晏到放工中間嘅一段時間,除咗享受西茶,再配啲甜品。由於錫蘭出產嘅紅茶味道較好而價錢又平,所以錫蘭紅茶喺香港好流行。西方人飲茶習慣加牛奶,令茶入口更香更滑,咁樣成為咗香港奶茶嘅基本。

製法[編輯]

所謂「絲襪奶茶」,係將煮好嘅紅茶用一個網先行過濾,作用除咗隔走茶渣之外,亦令紅茶更香滑,然後再加入淡奶。傳統嘅港式絲襪奶茶用淡奶加入煲好嘅錫蘭紅茶。原創人(蘭芳園茶餐廳林木河先生)用特製白布袋,但而家大部分人都會用一個棉鑲喺一個金屬框架度。

由於棉紗網經奶茶浸泡,網顏色同絲襪好接近,因此叫做「絲襪奶茶」,「絲襪」係女性用尼龍襪褲嘅俗稱(尼龍未面世前絲襪乃係用絲綢織成,而且多數係長筒絲襪),多數係肉色,收縮時呈咖啡色,第二次世界大戰後由美國傳入,初期叫「原子襪」,「蘭芳園大牌檔伙計將煮沸茶水倒入過濾網,上下拉動以加速茶水濾出,手法熟練誇張,狀似做秀,引人注目,係港式茶餐廳製作奶茶一大特色。過濾網染上奶茶,形狀顏色似尼龍襪褲,食客講笑叫做為「絲襪奶茶」,並唔係用絲襪做為濾網來過濾嘅。

用來沖奶茶錫蘭高地紅茶分為粗茶同幼茶兩種,餐廳透過控制粗幼茶嘅份量,就可以改變沖出來嘅奶茶嘅香味色澤濃度。一般茶餐廳會用一至兩種碎紅茶做主,攞佢嘅茶色同濃味,再配搭較高級嘅立頓錫蘭紅茶以帶出茶香[1]

沖茶時先將紅茶放入尼龍網度,然後將網浸入巨型水煲度,並用鉤將網鉤喺煲嘅邊沿。將茶燜喺茶煲入面幾分鐘後(叫做焗茶),將茶倒落另一茶壺度,來回倒幾次(叫做撞茶)。最後倒入已放入淡奶度。

絲襪奶茶嘅品質以入口幼滑延綿為好,能有適當嘅「厚度」(body)。而厚度係主要由淡奶嘅濃淡度所決定,奶脂濃度足夠時,奶茶就會喺表面凝結成啡色嘅奶衣,擁有呢樣厚度嘅奶茶就係所謂嘅「掛杯奶茶」[1]

至於將奶茶做成凍奶茶(冰奶茶)有三種方法:

  • 以往喺製冰機唔流行嘅年代,係先將奶茶倒入玻璃樽度,再放到雪櫃度慢慢雪凍,但係呢種做法已經好少見到。
  • 而家大部份嘅凍奶茶係透過喺奶茶加入冰塊來達到降溫嘅效果,缺點係慢慢溶解嘅冰塊會將奶茶原本嘅味道沖淡。
  • 第三種方法係用「恆溫水浴」嘅概念,將已有奶茶嘅茶杯放入一個有冰水同冰塊嘅容器度,奶茶就可以由頭到尾保持冰凍同濃度,呢種做法嘅奶茶叫做「冰鎮奶茶」。

參考[編輯]

  1. 1.0 1.1 識飲識食幼滑如絲 • 絲襪奶茶. 壹蘋果車網. 2005-01-31. 喺2011-05-10搵到;. 

睇埋[編輯]

出面網頁[編輯]