羅密歐與朱麗葉

出自維基百科,自由嘅百科全書
畫咗羅密歐與朱麗葉嘅畫

羅密歐與朱麗葉》(英文Romeo and Juliet)係莎士比亞所寫嘅一齣以愛情為主線嘅悲劇,喺1957年首演嘅百老匯音樂劇《夢斷城西》係由佢改編而成。

劇中最為人所熟悉嘅對白就係由朱麗葉所講:「羅密歐呀!羅密歐!點解你要係羅密歐?」(O Romeo, Romeo! wherefore art thou Romeo?)。

故事大綱[編輯]

第一幕[編輯]

第一場 維羅納嘅戶外地方 羅密歐屋企嘅下人同茱麗葉屋企嘅下人狹路相逢,重打起上嚟。
第二場 喺條街度 凱普萊嘅侄女係當時公認嘅靚女,將會參加凱普萊大宅嘅舞會,喺卞伏里奧慫恿之下,羅蜜歐決定要去結識個女仔。
第三場 茱麗葉屋企嘅一間房 凱普萊夫人話畀茱麗葉知,巴里斯將會參加個舞會,如果佢覺得合眼緣,可以畀佢哋結婚。
第四場 喺條街度 個舞會當晚,羅密歐、萬邱西奧同埋卞伏里奧搵機會混入凱普萊大宅,參加舞會。
第五場 茱麗葉屋企嘅一個大廳 喺個舞會度,羅密歐同茱麗葉一見鍾情。

第二幕[編輯]

第一場 凱普萊大宅嘅果園圍牆外面嘅小徑 羅密歐爬牆潛入凱普萊大宅嘅果園。
第二場 凱普萊大宅果園 羅密歐私會茱麗葉,互相表白,重決定要第二日結婚。
第三場 勞倫斯嘅教堂休息室 羅密歐搵勞倫斯幫佢同茱麗葉證婚。
第四場 喺條街度 羅蜜歐委託奶媽將佢嘅結婚嘅計劃,話畀茱麗葉知。
第五場 凱普萊大宅嘅果園 奶媽幫羅密歐通風報信,叫茱麗葉去勞倫斯嘅休息室。
第六場 勞倫斯嘅教堂休息室 由勞倫斯證婚,羅密歐同茱麗葉結成夫婦。

第三幕[編輯]

第一場 公眾地方 萬邱西奧同泰保爾決鬥時被殺,羅密歐為佢報仇殺死太保爾,結果親王下令放逐羅密歐。
第二場 凱普萊大宅嘅果園 奶媽答應茱麗葉嘅請求,帶羅密歐嚟同佢道別。
第三場 勞倫斯嘅教堂休息室 奶媽同勞倫斯一齊鼓勵羅密歐,要佢離開前搵茱麗葉道別。
第四場 凱普萊大宅 凱普萊答應巴里斯嘅提親,佢可以喺嚟緊嘅星期四同茱麗葉結婚。
第五場 凱普萊大宅嘅果園 羅密歐同茱麗葉道別。

第四幕[編輯]

第一場 勞倫斯嘅教堂休息室 茱麗葉當然唔可以同巴里斯結婚,佢搵勞倫斯幫手,勞倫斯畀咗一樽假死藥佢,同埋答應叫約翰送信畀羅密歐,講畀羅密歐知佢哋嘅計劃。
第二場 凱普萊大宅 凱普萊命令茱麗葉必須喺星期四同巴里斯結婚。
第三場 茱麗葉嘅睡房 茱麗葉敷衍凱普萊夫人,佢第二日會去結婚,想早啲休息。喺所有人走咗後,佢就飲咗樽假死藥。
第四場 凱普萊大宅 大宅嘅所有人忙住準備婚禮。
第五場 茱麗葉嘅睡房 茱麗葉嘅屋企人發現佢死咗,所有人都好傷心。佢哋隨即將茱麗葉送去墳場下葬。

第五幕[編輯]

第一場 曼切華嘅街頭 羅密歐嘅下人將茱麗葉嘅死訊帶到曼切華(英文Mantua),令佢傷心欲絕。
第二場 勞倫斯嘅教堂休息室 勞倫斯發覺約翰未將佢封信帶畀羅密歐,要喺茱麗葉醒番前趕去墳場。
第三場 凱普萊家族嘅教會墳場 羅密歐喺墳場遇到巴里斯,爭執起嚟,將佢殺咗之後,重服毒自殺。茱麗葉嘅假死藥效力過咗,醒番後見到羅密歐嘅屍體,萬念俱灰,用羅密歐把匕首嚟自殺。

角色[編輯]

羅密歐屋企

  • 羅密歐(Romeo)
  • 蒙太裘(Montague)係羅密歐嘅阿爸。
  • 蒙太裘夫人(Lady Montague)係羅密歐嘅阿媽。
  • 卞伏里奧(Benvolio)係羅密歐嘅堂哥兼好友。
  • 利菲亞(Balthasar)係服侍羅密歐嘅下人。
  • 亞伯蘭(Abram)係羅密歐屋企嘅下人。

朱麗葉屋企

  • 朱麗葉(Juliet)
  • 凱普萊(Capulet)係朱麗葉嘅阿爸。
  • 凱普萊夫人(Lady Capulet)係朱麗葉嘅阿媽。
  • 泰保爾(Tybalt)係朱麗葉嘅表哥。
  • 奶媽(Nurse)係朱麗葉嘅近身下人兼親信。
  • 彼得(Peter)係朱麗葉屋企嘅下人。
  • 森信(Sampson)係朱麗葉屋企嘅下人。
  • 格哥利(Gregory)係朱麗葉屋企嘅下人。

其他角色

  • 親王(Prince)係維羅納嘅統治者。
  • 萬邱西奧(Mercutio)係皇室成員,亦係羅密歐嘅好友。
  • 巴里斯(Paris)係皇室成員,佢想娶朱麗葉做老婆。
  • 勞倫斯(Friar Lawrence)同羅密歐朱麗葉秘密證婚嘅神父。
  • 約翰(Friar John)幫勞倫斯送信畀羅密歐。
  • 賣藥嘅人(Apothecary)賣毒藥畀羅密歐嘅人。
  • 市民(Citizen)幾個
  • 下人(Servant)幾個
  • 樂師(Musician)幾個
  • 侍衛(Guard)幾個

粵語演出[編輯]

1980年[編輯]

日期:1980年7月31號至8月10號[1]
地點:香港大會堂劇院
主辦:市政局香港話劇團
導演:格蓮‧華霍英文Glen Walford
製作設計:雲蒂‧布烈治英文Wendy Bridges
燈光設計:陸柏利英文Barry Noakes
音樂總監:方錦源
編舞編排:黃淑珍
演員:蕭國強(飾演羅密歐)、羅冠蘭(飾演朱麗葉)、張悅鍾(飾演蒙太裘)、陳麗卿(飾演蒙太裘夫人)、利永鍚(飾演凱普萊)、李劍芝(飾演凱普萊夫人)、黃美蘭(飾演奶媽)、羅雲(飾演親王)、黃浩義(飾演萬邱西奧)、何文蔚(飾演巴里斯)

2004年[編輯]

日期:2004年3月12號至13號[2]
地點:香港演藝學院歌劇院
主辦:香港演藝學院
導演:蔣維國
翻譯:廖梅姬
編舞:高家霖
佈景設計:陳雅君
服裝設計:倫希文
燈光設計:張國永
音響設計:鄧志勇
作曲:許樂民
演員:鄭嘉俊張狄鳴郭兆龍李趣慧李冰蘭彭雁玲蘇迪輝曾慕雪王君傑庾春鳳

出名對白[編輯]

[3]

羅密歐進場】

朱麗葉

羅密歐啊,羅密歐,你點解要叫羅密歐!

羅密歐

以後你淨係稱呼我做「愛人」就得喇,我將會好似重新受咗洗噉,唔再係羅密歐。

參考[編輯]

  1. Romeo & Juliet = 羅密歐與茱麗葉. 香港公共圖書館. 1980-07-31. 喺2018-03-14搵到.話劇場刋
  2. . 香港演藝學院. 2004-03-12. 原著喺2020-03-28歸檔. 喺2018-03-14搵到.
  3. Romeo and Juliet. The Complete Works of William Shakespeare,句嘢:"O Romeo, Romeo, wherefore art thou Romeo?"

出面網頁[編輯]