羅海星

出自維基百科,自由嘅百科全書

羅海星Lo Hoi-sing1949年2010年1月14號),原名羅海鮮,係香港生意人。佢係香港民主運動支持者,最出名係搞黃雀行動,協助營救中國六四事件異見人士海外,行動失敗被補而坐監。佢係香港《新晚報》前總編輯羅孚

屋企[編輯]

羅海星老頭(頭讀豆)係羅孚,係中國共產黨人士。一九四八年來香港《大公報》做事。

第二年,一九四九年,羅海星響香港出世。羅孚睇過香港仔海景,印像深刻,就以海鮮為名,同個仔改名叫羅海鮮,等人一聽個名就知香港仔。不過又見個仔成日畀同學笑,所以改名羅海星。

一九六五年,羅海星培僑中學畢業,返中國大陸讀書,響廣州外語學院升學,主修英文。一九六六年,文化大革命爆發,佢參加共青團紅衛兵。但係咁,佢對中國共產黨有質疑。

事業[編輯]

一九七零年,佢響外語學院畢業,分配到廣東省陶瓷進出口公司做嘢。一九七九年,佢同兒童文學作家周蜜蜜結婚。同年可以返香港同家人團聚,響香港有中共背景嘅《經濟導報》任職。

一九八二年,老頭羅孚係當時《新晚報》總編輯,中國當局指羅孚係間諜,誘佢去北京,畀中共軟禁十年。羅海星就轉工做新鴻基證券駐廣州代表。一九八六年,佢出任香港貿易發展局北京首席代表。

一九八九年初,佢辭職轉營中港生意。

黃雀行動[編輯]

一九八九年六四運動後期,佢用自己大陸人脈,協助香港黃雀行動。佢首先協助馬波,《法制日報記者,六四凌晨,佢目擊清場。馬波臨行前同羅海星講,重有兩人等救[1]蛇頭話畀佢知,呢兩人係陳子明王軍濤。原來蛇頭係二五仔,出賣羅海星等人。同年十月十四號,羅海星響廣州酒店收風知道行動失敗。佢搏一響羅湖過關,回鄉證過唔到電腦被捕。呢次重有差唔多七十內地人被捕,包括陳子明。另外重有兩香港人,係「江湖人物」助手,負責用大飛接載,都畀人捉埋。而王軍濤走甩,用其他方法去美國[1]

羅海星被控窩藏反革命罪犯,判坐監五年。呢個係李鵬辦公室下令判佢五年,以當時情況,無判十年就算好[1]

一九九一年,當時英國首相馬卓安到中國,傾香港新機場玫瑰園計劃。馬卓安要求放羅海星,同中方傾掂數。羅海星響馬卓安走咗無耐就放人。羅海星坐直通車返香港,副政治顧問柏聖文來到紅磡,送上首相賀咭。年底,佢去英國探親。英國當局見到佢入境紀錄,請佢去唐寧街首相府。傾完一輪,佢同馬卓安合照。因為呢張相,中共政府好嬲,收返佢回鄉證十幾年,直至二零零五年佢患血癌,經多方穿針引綫先至拎得返,入大陸醫病[1]

晚年[編輯]

羅海星二零零五年患血癌,佢細佬捐過骨髓畀阿哥,做骨髓移植,但病情都係反覆,免疫力好弱。二零零九年十月中,佢染到豬流感,好過,但十一月尾又肺炎,入瑪麗醫院,重入埋深切治療部。佢之後一度好返啲,以為可以出院。之不過,第二年,二零一零年一月十一號星期一,天氣突然凍返,肺炎惡化,醫生話佢肺部組織嚴重受損。到十三號晚,佢半昏迷,到十四號凌晨不治[2]。終年實齡六十一歲。[3]。佢二月三號響世界殯儀館設靈,二月四號舉殯火化。

[編輯]

  1. 1.0 1.1 1.2 1.3 . 信報. 2009-05-25. 原著喺2009-06-25歸檔. 喺2010-01-20搵到.
  2. 加黃雀行動 營救民運人士坐牢 良心香港人羅海星病逝. . 2010-01-15.
  3. . 原著喺2010年1月16號歸檔. 喺2010年1月19號搵到.