美麗島事件

出自維基百科,自由嘅百科全書
跳去: 定向搵嘢

美麗島事件(又叫高雄事件高雄暴力事件叛亂案)係發生喺1979年12月10號台灣,美麗島雜誌社喺高雄舉行咗一次爭取民主示威遊行,有二萬幾人喺度慶祝聯合國發表「世界人權宣言」卅一週年紀念會,最後演變成警民對峙,政府出動鎮暴部隊、鎮暴車同催淚彈對付集會嘅人。呢次事件,對而家台灣政治發展有深遠影響。

背景[編輯]

後,國共鬥爭激烈化,中華民國政府因為咁退守台灣,成為台灣政權。

1949年中華民國政府喺台灣落定腳之後,國民黨長期一黨專政,針對共產黨統戰手段,國民黨政府實施好多嚴厲手段限制人民喺言論、集會、結社嘅自由,又實施戒嚴、黨禁,即係話人民無組織政黨嘅自由。

喺戒嚴令之下,好多人畀政府亂咁捉去坐監,重有啲畀人判咗死刑,唔少都係冤枉錯判。政府因為逼得啲人民太緊,民間開始興起好多反對勢力,呢啲反對勢力叫做「黨外」,即係國民黨以外。

呢啲黨外人仕爭取人權保障、司法獨立同反對戒嚴、爭取集會同結社自由,呢個時期好多人以創辦雜誌嚟做小眾媒體發表意見,1950年代出版嘅《自由中國》係嗰陣時爭取言論自由嘅代表。1960年《自由中國》組織咗一個叫「中國民主黨」嘅政黨,但畀政府取締,而《自由中國》亦都停刊。

一路到1970年,好多爭取言論自由民主嘅新興黨外勢力出現,其中以《臺灣政論》、《八十年代》、《美麗島》呢三本雜誌最有代表性,而政府亦成日針對呢幾本雜誌,得閒無事就會查禁吓、打壓吓咁。結果民間黨外勢力對開放黨禁、報禁同癈除戒嚴嘅要求越嚟越激烈,就喺咁嘅背景之下,終於觸發美麗島事件。

經過[編輯]

「黨外」人士黃信介1979年創辦《美麗島雜誌》,9月8號喺中泰賓館舉行慶祝創刊,國民黨嘅人發起「疾風行動」,聚埋大班人包圍中泰賓館,最後演變成衝突。之後《美麗島雜誌》一路唔理喺邊設分社同服務處,疾風行動嘅人都會話自己係「反共義士」走去搗亂,黃信介屋企重試過畀人放火。

不過由於《美麗島雜誌》係唔同地方設嘅服務處令佢哋喺民間聚咗好多支持者,重令到美麗島雜誌社成為黨外運動嘅指揮中心,所以親政權嘅人就專針對美麗島係咁挑釁同刺激,令到兩班人關係好僵。

於是,《美麗島雜誌》就決定喺1979年12月10號國際人權日,喺高雄舉行「人權大會」同示威遊行。

嗰日有成二萬幾人參加集會,點知國民黨政府話係叛亂,出動鎮暴部隊、鎮暴車同催淚彈圍剿集會人仕。

政府暴力鎮壓之後,好多黨外運動主力嘅人都畀政府拉晒,黨外運動一時間可以話停晒。

影響[編輯]

美麗島事件之後,黨外運動可以話無晒,但原本一啲溫和派嘅黨外人士,開始承接黨外運動,變成黨外運動主力。另外,美麗島事件入面畀人拉咗去坐監啲黨外人士嘅家屬,好似姚嘉文老婆周清玉張俊宏老婆許榮淑,亦成為黨外運動嘅中堅,形成新興嘅黨外勢力。

而喺審判美麗島事件入面畀人拉咗嘅黨外人士度,有一批幫黨外人士辯護嘅律師,亦成為新興嘅黨外勢力之一,呢批人有江鵬堅陳水扁蘇貞昌謝長廷張俊雄

呢件事亦令有一批學生同青年,開始關心政治,好似作家林雙不宋澤萊,亦係新興嘅黨外勢力。

民主進步黨成立[編輯]

黨外人士一直以「黨外選舉後援團」、「黨外中央後援會」呢類組織活動,但始終唔係正式政黨,原因係喺黨禁之下,人民無組黨自由,雖然台灣嗰陣時除咗國民黨,重有民社黨、青年黨,但呢啲黨其實都係幫國民黨做教育工作,根本有等如無。

自從1979年12月爆發美麗島事件之後,黨外運動受到好大打擊。一直等到1986年,新興嘅黨外勢力組成嘅「公政會(全名:黨外公職人員公共政策研討會)」喺唔同地方成立分會,民間亦對組織政黨嘅要求越來越大,於是有班人就唔理黨禁,喺9月28號成立「民主進步黨(簡稱民進黨)」。喺十一月召開第一次全國代表大會,選咗江鵬堅做第一任黨主席。

雖然政府重未解除黨禁,不過喺經過美麗島事件同之後好多新興嘅黨外運動,加上民國政府已經放棄咗反共復國觀念,改為民主統一中國,所以民進黨成立嗰陣,政府都由得佢。終於政府喺1987年開放黨禁,而喺開放黨禁之後,新政黨一路係咁成立,到1991年已經有68個登記咗嘅政黨,而民進黨喺咁多政黨之中,一路到而家都係國民黨之外台灣最大政黨之一。

[編輯]