義弟

義弟（讀音：yì dày），係兩個至幾個人走埋一齊，因為意趣相投，惺惺相識而希望進一步成為親如兄弟姐妹嘅關係，經過結拜之後，咁年紀比較大嘅就係義兄或者義姊，而年紀比較細嘅男性就被稱為義弟。

不過要清楚一點嘅係，「義兄弟」係由結拜而嚟，要一齊向天宣誓日後要有福同享有難同當，有同生共死嘅意味；而「契兄弟」呢啲就係由上契而成，係由做細嘅向做大嘅表上敬意，多數係斟茶叩頭，表示甘願做細佬，有啲上司下屬咁嘅味道。所以兩者嘅概念雖然好相近，但其實當中嘅意義係有唔同嘅地方。

不過今時今日嘅香港社會（除咗黑社會之外）已經冇話結義冇話要向天罰誓咁浩氣干雲，同埋個形式已經同「契」混淆成一樣嘅嘢，有時當意趣相投好傾好玩嘅人走埋，只要有人提出，就隨時可以成為人哋嘅契爺、契媽、契哥、契姐、契妹、契細佬…。