翡翠台

翡翠台（Jade），係無綫電視嘅旗艦頻道，喺1967年11月19號正式啟播，大部分時間都係用廣東話播放，部分嘅節目就會利用麗音技術（模擬版本）或者係多重AC-3位流（數碼版本）同時以普通話或者英語等語言播放。翡翠台多元化嘅節目包括新聞、電視劇、綜藝、動畫同埋訪談節目等。主要嘅競爭對手係亞洲電視嘅本港台。

收視

通常翡翠台最高收視嘅時段係星期一至五晚21:35-22:35，平均收視去到32點，佔全港電視觀眾80%以上，而喺其他時段翡翠台都有比較高嘅收視。主要原因係大部份香港觀眾都認同翡翠台嘅節目製作質素總括嚟講都比同樣係免費電視嘅中文頻道本港台好。另一方面，有啲觀眾認為，翡翠台嘅畫面質素好過本港台，對於呢啲見解，曾經有觀眾喺2007年6月30號晚進行比較；嗰晚翡翠台同本港台都係同時播放同一個節目－－慶祝香港回歸祖國十週年文藝晚會，觀眾喺睇翡翠台嘅畫面一陣之後，再將畫面轉到本港台，有啲觀眾認為，本港台轉播嘅畫面差過翡翠台。

從90年代到而家，香港成立咗唔少新嘅收費電視台，例如衛星電視、有線電視、寬頻電視等等，但係整體觀眾人數同影響力仍然遠遠唔及無綫，箇中嘅原因，係翡翠台所製作嘅免費節目嘅質素已經可以滿足到大部份香港觀眾，而唔駛再花費收睇收費電視（無線電視本身亦都有開辦收費電視，叫做無綫收費電視，但係開台到而家都係蝕）。因為咁樣，造成無綫有唔少高忠誠度嘅觀眾，形成慣性收視；呢種情況喺世界上實屬罕見，喺其他國家同地區，電視行業競爭激烈，幾乎所有電視台都“勢均力敵”，並冇出現好似香港咁樣由一間電視台（就香港嚟講，就係指無綫）「一台獨大」嘅情況。

無綫擁有慣性收視嘅最佳例證，係喺90年代，無綫電視曾經因為發射站故障而令到所有觀眾都睇唔到呢個台嘅節目三十分鐘，畫面剩係見到雪花（無訊號畫面），仍然成功取得五成幾收視。

慣性收視帶嚟嘅結果，係無綫嘅製作同藝員團隊因為咁樣而日益龐大，並且擁有先進嘅電腦設備同擁有兩個金曲頒奬典禮、香港小姐、歌唱賽事、台慶同埋其他大型節目等。

翡翠台全港模擬電視訊號發射頻道同埋頻率

發射站	頻段	頻道
慈雲山(主)	UHF	第21頻道
將軍澳村、虎地、元朗374	UHF	第22頻道
西貢對面海	UHF	第24頻道
荃灣、坑口村、中西區、元朗新時代廣場	UHF	第26頻道
九華徑、大埔泮涌村、鴨脷洲及香港仔	UHF	第28頻道
馬灣田寮村	UHF	第29頻道
藍地、長洲	UHF	第32頻道
金山、南朗山、砵甸乍山、康樂園、大澳、沙田駿景園、薄扶林	UHF	第33頻道
青山、飛鵝山、赤柱、石壁、元朗安樂路	UHF	第34頻道
茶果嶺	UHF	第36頻道
營盤、屯門數村	UHF	第39頻道
深井	UHF	第41頻道
東涌數村	UHF	第45頻道
柴灣、聶高信山、紅花嶺、筆架山、大嶼山275、上洋山、元朗297、大欖涌141	UHF	第48頻道
九龍坑山、南丫島、琵琶山、照鏡環山、橫洲、石崗、大埔仔、沙頭角	UHF	第49頻道
葵涌大白田	UHF	第51頻道
青衣	UHF	第57頻道
馬灣	UHF	第58頻道

數碼同步廣播

翡翠台喺2007年12月31號正式開始以地面數碼訊號同步廣播，並用81為台號。數碼廣播嘅翡翠台內容同模擬廣播嘅一樣，但係會以16:9輸出，字幕亦都可以閂咗佢。

中國廣東省收睇翡翠台

翡翠台覆蓋範圍覆蓋成個廣東省同埋廣西省梧州市農村（廣西成個省嘅電視信號係由省台嘅數碼電視壟斷，用嚟轉播中央電視台同各地中共所辦嘅電視台頻道，目前剩係得梧州市農村地方可以睇到香港嘅電視台）。

廣州

廣州而家有兩間有綫電視台，一間係「廣州市有綫電視」（即係「市綫」），由「廣州電視台」負責接收衛星信號播出，另一間係「廣東有綫廣播電視網絡股份有限公司」（以前叫做「廣東省有綫電視台」即係「省綫」）係由「南方電視台」負責接收衛星信號播出。監管廣州市有綫電視嘅政府機構係「廣州市新聞出版和廣播電視局」，監管廣東有綫電視嘅政府機構係「廣東廣播影視局」，呢兩間政府機構都有網上投訴項目，如果觀眾發現翡翠台或者明珠台等等境外電視台被插播圖標廣告，有綫電視就係犯咗法，觀眾可以立即舉報投訴。喺廣州，「省綫」插播嘅本地廣告比較少，所以不時都可以睇到香港翡翠台嘅原裝廣告，而「市綫」就將翡翠台當做自己嘅電視台一樣，喺黃金時段猛播本地廣告，而且就算本地廣告播完，亦都仍然唔退出嚟，而係繼續播宣傳自己廣州電視台節目嘅宣傳片。

廣東其餘地區

廣東省入面其他城市收睇到嘅翡翠台節目都係嚟自廣州「省綫」，呢個信號就係喺廣州市播放嘅信號，當呢個信號傳送到下面縣市嘅時候，就會再畀當地市級電視台、縣級電視台、同埋鎮級電視台層層插播，結果往往會導致插播廣告超時，而且由於插播廣告嘅質素參差不齊，通常最底下嘅電視台插嘅廣告最為「嘔心」。

收視服務及費用

而家廣東省嘅觀眾如果想睇翡翠台，一定要同所在城市嘅有綫電視台申請報裝有綫電視服務，並以有線電視型式接收電視訊號，每個月畀大概20蚊人民幣嘅收視費（廣州地區￥26.5）。不過，地方有線電視台仍然會插播本地廣告以增加收入。

播放內容

節目播放方面，中國大陸收睇翡翠台嘅節目同香港收睇嘅一樣（但係因為地方電視台將嚟自廣州嘅有線電視插播廣告遮蓋，所以節目嘅開頭同結尾小部分時段會被剪咗），但喺廣告時段同埋播放中國大陸敏感嘅政治消息時，地方電視台會插播廣告或者預先錄好嘅香港政府宣傳片（1998年之前係測色版畫面）。中國大陸民眾會將呢類插播叫做「Cut 咗」（源自英文cut）。

海外版本

喺洛杉磯有線電視同三藩市有線電視播放，以粵語轉播，著重提供南加州嘅訊息。除咗全日轉播香港，美國同國際新聞之外，另外有當地新聞同社區消息。資訊性節目包括財經報導同時事談討節目。另外有連續劇，娛樂新聞，兒童節目，音樂節目，生活資訊，旅遊節目等等。重有翡翠美東台同翡翠美西台，都以粵語轉播為主。翡翠美東台畀觀眾收睇TVB劇集，馬拉松式不停播放，畀班觀眾一次過睇幾集。TVB劇集分時裝同古裝兩大類。時裝劇包括動作、喜劇、合家歡、浪漫愛情、科幻等等。而古裝劇集就包括參考自中國文化歷史同文學巨著嘅功夫武俠片同歷史巨獻，翡翠美西台提供多元化節目，多數係TVB製作。除咗轉播香港，美國，同國際新聞外，更加有全新嘅TVB劇集，娛樂綜藝、社會民生、兒童節目、卡通片同埋資訊旅遊節目。娛樂節目更加包括音樂節目以及娛樂新聞。

網上直播

電視廣播有限公司網站裏面嘅MyTV有直播翡翠台各節新聞嘅功能，同埋24小時直播互動新聞台嘅節目。

參閱

• 電視廣播有限公司
• 香港電視廣播
• 中國電視審查

節目內容投訴

• 香港：香港廣播事務管理局 [1]
• 大陸廣東：
  • 廣東省廣播電影電視局[2]（負責廣州市同埋成個省嘅有綫電視違例插播廣告嘅投訴處理）
  • 廣州市新聞出版和廣播電視局[3]（剩係負責對廣州市有綫電視違例插播廣告嘅投訴處理）

資料來源

• 香港電視廣播服務頻率表 [4]

鏈出去

• 無綫電視翡翠台
• 電視廣播有限公司