聖公會聖基道兒童院

出自維基百科,自由嘅百科全書
跳去: 定向搵嘢

聖公會聖基道兒童院英文Sheng Kung Hui St. Christopher's Home)響1935年聖公會港澳教區何明華會督創辦,最初主要係收留當時社會上戰亂嘅孤兒,現時已發展為多元化兒童服務機構,係香港擁有最多兒童之家服務名額嘅非政府機構。總辦事處設喺北角香港青年協會大廈。

[編輯]

鹿茵山莊入口

聖基道兒童院初名「大埔農化孤兒院」,院舍響新界大埔滘大埔道十三咪半,即「鹿茵山莊」現址,院內有學校,院童響課餘會開墾山邊梯田耕作,學習農畜同手工藝等技能。1954年改名「聖基道化院」,院務擴展到營辦全港多間細路服務嘅慈善機構。1994年結束「大埔聖基道兒童院」院務,喺沙田設立嬰兒部同埋響港、九、新界各區成立24個兒童之家,為來自破碎家庭嘅細路同青少年提供住宿照顧服務。

發展[編輯]

聖公會響兒童院搬走後,向政府申請將院舍改做神職人員宿舍被拒,及後響1990年獲批准發展住宅物業,聖公會揀同長江實業合作發展。由於地皮由聖公會提供,補地價同建築費等由長實負擔,物業落成後長實預留三分之一嘅樓面畀聖公會[1]。院舍地皮最終發展成為佔地超過196萬平方呎包括22幢獨立花園洋房、5幢高座住宅同5幢低座住宅嘅「鹿茵山莊」[2],響1998年落成賣出,以超過萬蚊呎價推售,一度引起市場震動[3]

稅務局認為聖公會響土地發展上獲得巨額利潤,徵收七年來合共1億8,000萬港元利得稅,聖公會以所得嘅鹿茵山莊單位安排退休神職人員入住,而所得資金全撥慈善用途,不服稅務上訴委員會裁決,上訴至高等法院

服務[編輯]

兒童之家同寄養服務嘅申請均須透過社會福利署中央轉介系統轉介,膳食同住宿免費,但小朋友嘅家人或監護人須支付入住小朋友嘅其他個人開支,如書簿費、零用錢等。

兒童之家[編輯]

聖基道兒童院響香港共設有24間兒童之家,每個家舍服務8名細路。兒童之家專為4至18歲,因家庭問題需要暫時離家嘅細路同青少年,提供近似家庭模式嘅24小時住宿照顧服務。

柴灣尤德夫人醫院高級職員宿舍
  • 真理兒童之家
  • 公義兒童之家
  • 平安兒童之家
  • 救恩兒童之家
  • 靈光兒童之家
  • 信實兒童之家
觀塘秀茂坪邨
  • 雅各兒童之家
  • 安德烈兒童之家
  • 彼德兒童之家
葵涌安蔭邨
  • 約翰兒童之家
  • 腓力兒童之家
  • 湯馬兒童之家
青衣長亨邨
  • 馬太兒童之家
  • 西門兒童之家
  • 達太兒童之家
天水圍天瑞邨
  • 仁愛兒童之家
  • 喜樂兒童之家
  • 和平兒童之家
天水圍天耀邨
  • 忠實兒童之家
  • 溫柔兒童之家
  • 節制兒童之家
  • 忍耐兒童之家
  • 恩慈兒童之家
  • 良善兒童之家

寄養服務[編輯]

聖基道兒童院提供35個一般寄養服務名額,另有15個緊急寄養服務名額。寄養服務為細路配對合適嘅寄養家庭,畀細路可以喺安全穩定嘅環境內居住。

幼兒教育[編輯]

聖基道兒童院響2006年初增設幼兒教育服務,為2-6歲細路提供學前教育同日託服務。現時開咗兩間幼兒院,每間幼兒園可容納一百名小朋友,服務名額合共二百位。

幼兒院
  • 聖公會聖基道幼兒園(葵涌)
  • 聖公會聖基道幼兒園(灣仔)

兒童健康發展綜合服務[編輯]

2007年灣仔運盛大廈開展「健苗軒」,提供細路全人健康嘅指導同訓練、細路健康評估同跟進服務,推行宣揚細路健康訊息嘅學校同社區教育活動。

新來港人士服務[編輯]

聖基道兒童院響1999年10月喺沙田區開設為來港唔夠4年嘅新來港細路同家庭提供「一站式」嘅支援服務。

新來港人士服務中心同外展服務

新來港人士服務中心響瀝源邨綠泉樓,中心主動接觸服務對象,並提供社區資訊諮詢、教育服務、適應小組、共融活動、個案輔導同轉介服務。外展服務主要聯繫社區嘅服務點如學校、教會同各機構,接觸缺乏支援嘅新來港人士同低收入家庭。

聖基道普通話學院

學院幫新來港人士考取專業普通話教授資格,以專業服務社群。

[編輯]

出面網頁[編輯]