臘八

臘八即係臘月初八，臘月即係農曆12月，呢日又叫做「成道節」、「成道會」、「佛成道日」，本來係一個佛教節日，係中國傳統入面，春節之前，除咗冬至之外另一個重要節日。不過而家已經唔多人慶祝呢個節日，只係喺中國江南、東北、西北地區重有啲人會慶祝。

源由

臘八有兩個來源，一係話呢日係中國傳統祭祀祖先同神靈嘅節目，即係「臘祭」。另一個就話呢日係佛祖釋迦牟尼成道嘅日子，即係「佛成道日」

臘祭

臘八節原本係中國古代嘅臘祭，因為古代中國人係以農業為主，而當每年豐收嘅話，古時啲人就會認為係神靈保佑嘅結果，於是就會舉行慶祝活動。後來有人喺臘祭之後順便做埋宴鄉活動，慢慢就發展成祭祀祖宗嘅活動。一路到南北朝時期，就正式定咗臘月初八做臘八節。

喺呢日會有「擊鼓驅疫」嘅習俗，啲人會喺腰度有一個細鼓，頭帶住個胡頭，然後扮金剛力士打鼓，驅除疫病。

佛成道日

根據佛教傳說講，佛祖釋迦牟尼係喺十二月初八成道，喺佢成道之前，因為修苦行而唔食嘢，搞到骨瘦如柴，諗住放棄苦行，呢個時候有個牧羊女仔畀咗啲乳糜佢食，食咗之後有返體力，之後佢就坐喺菩提樹下面沉思成道，創立佛教。

中國嘅佛教徒為咗紀念呢件事，於是就定咗農曆十二月初八煮粥供佛，呢啲粥叫做臘八粥。而食粥就變成臘八節其中一個習俗。

臘八詞源

「臘八」呢個名，係出自《百丈清規》卷二：「臘月八日，恭遇本師釋迦如來大和尚成道之辰，率比丘眾，嚴備香花燈燭茶果珍饈，以供申養。」