荔枝灣

  提示：呢篇文講嘅唔係荔枝角灣。

荔枝灣（粵讀：lai⁶ zi¹ waan¹，英文：Litchi Bay、Lychee Bay），簡稱荔灣，喺廣州西關從泮塘到黃沙一帶，地處西關核心，荔灣區個名就因佢而來。喺城市化之前，荔枝灣係省城聞名嘅風景區，人讚「小秦淮」、「嶺南第一勝景」，「荔灣漁唱」係羊城八景之一，有幅對聯講盡荔枝灣嘅靚法：「一灣溪水綠，兩岸荔枝紅」，曾經用來做廣州城市宣傳。響2012年嘅羊城八景入面重攞咗「荔灣勝景」呢個名。

位置

1930年代省城地圖。陳家祠西北嘅洗馬涌有「荔枝灣」地名，雖然同家下做景點嘅荔枝灣唔相連，不過都係荔枝灣地區。

荔枝灣舊時係一大笪濕地，係西關涌（包埋上下兩截）、荔枝涌幾條涌嘅總稱。荔枝灣分新舊兩部分，舊嘅喺荔灣路以西、中山八路以北，新嘅喺荔灣湖、多寶路、黃沙一帶。而家西關涌揭蓋復涌，順住來睇，新荔枝灣大約從文塔、仁威廟附近順住去龍津橋、風水基、行過荔灣湖、一直去到黃沙水閘。

荔枝灣舊時屬南海縣恩洲堡伴塘鄉，同花埭（即花地）、芳村隔住珠江，灣水同珠江連通，可以通出石門、白鵞潭，附近就有大坦沙；而北面去到洗馬涌，同象崗西南嘅芝蘭湖（而家流花湖）相通。

史

肇始

荔枝灣有兩千幾年歷史，從漢代南越國時代開始有，前196年漢朝特使陸賈來南越國勸降趙佗，初時勸唔掂，喺城西築土城做駐地繼續勸降，期間喺土城無遠埞嘅溪邊（而家周門、彩虹橋一帶）種蓮藕、荔枝。東漢時，呢度出產嘅荔枝係貢品，兼做外蕃使臣嘅贈禮，從嗰時起呢度就嗌荔枝洲或者荔枝灣，舊荔枝灣出現。

唐朝到明朝

唐朝時荔枝灣興盛起身，有「十里紅雲、八橋畫舫」嘅講法。咸通年間（861年到875年）嶺南節度使鄭從讜喺荔枝灣起荔園，荔枝灣出現花園。從曹松《南海陪鄭司空遊荔園》就睇出當時荔枝灣嘅荔枝出晒名。

南漢時，荔枝灣開始繁盛期。當時嘅後主劉鋹喺荔枝灣起顯德園（即昌華苑），係達三十餘里嘅御果園，荔枝熟時，佢就同妃嬪內臣喺度大排「紅雲宴」風流快活，紅雲即荔枝。相傳因為荔枝熟時，時時有驟雨，啲妃嬪急住避雨時，身上珠寶首飾賴低好多，所以後人喺荔枝灣度會執到珠寶。

宋滅南漢，焚燬昌華苑嘅宮殿，但荔枝灣無荒廢，成個宋代都係廣州一景。

元代，荔枝灣又一次做御果園。除咗種荔枝，重種里木樹（即檸檬）800幾樖。啲檸檬熟咗就搾汁落糖煮，整成「舍里別」（蒙古話，即係頸渴水）進貢，當時元世祖忽必烈同元成宗鐵穆耳好鍾意飲。

明代之後，荔枝灣唔再係皇室禁地，開放得平民入內，一啲文人雅士聚集呢度，慢慢噉園林起多咗。同時不但有荔枝、五秀，重因為水系拓展，由舊時嘅河溪仔變成一大片水網，連通白鵞潭，有漁民日頭出船撈魚，入夜返灣泊船，「荔灣漁唱」成為明代羊城八景之一。

清朝到日本侵華

從清代到日本侵華前，荔枝灣最旺。嗰時因為農業進步，無論荔枝種類、栽種面積都去到歷代之最，同時人氣旺到極，文人來吟詩作畫，富豪圈地起別墅，荔枝灣嘅景緻比得上江南水鄉，張維屏有詩話「千樹離支四圍水，江南無此好江鄉」（離支即荔枝）。

亦就呢時開始，新舊荔枝灣更替。清代時荔枝灣拓展到而家多寶路廣州第二人民醫院、荔灣涌、西郊泳場一帶，舊荔枝灣逐漸廢棄，新荔枝灣興起。當時新荔枝灣起咗好多有名花園，比如唐荔園、海山仙館、葉氏小田園、停讕堂水榭、小畫舫齋。而家得返小畫舫齋嘅遺跡。

陳濟棠主粵，荔枝灣去到歷史上最旺嘅時候。之後日本侵華，廣州淪陷，灣水通珠江嘅口畀日本人封鎖，遊客大降，直到陳耀祖做日本控制嘅廣東省長，解除封鎖先逐漸旺返。

二戰後變遷

睇埋：荔灣湖公園

1940年代，廣州人口增加，市區拓展，荔枝灣逐漸變成貧民農戶聚居處，啲人喺荔枝基起屋，斬咗好多荔枝樹，後來呢啲聚居區變成村，例如荔溪東南北三約、泮塘首約到五約。40年代末，荔枝灣附近做咗工業區，啲涌汙染晒，荔枝難生。

1958年設荔灣湖公園，保留咗部分湖、涌，當時逢源橋到多寶橋都有水。1966年，區府治理河涌時喺荔枝灣口起咗個防潮閘，從此艇仔無得出珠江，之後呢啲地方繼續城市化，工廠、人口聚集，荔枝灣水系變成污水池，好多濠涌唔係填咗就係冚蓋變暗渠、起晒街。1985年左右荔灣湖到多寶橋條涌冚咗；1992年泮溪酒家就逢源橋最後一條涌都冚埋，荔枝灣徹底消亡。

1999年政府提出「復建荔枝灣故道」嘅提案，所謂故道係指荔灣湖公園內靠黃沙大道一邊重保留400米長嘅舊時河道，重保留住泥岸呢啲荔枝灣舊時風貌。原本話個主題係「改善江岸河堤環境，開發水景旅遊景觀」，但查實方案1998年就有，配合防洪工程，1999年就施工，結果飛晒泥岸，從河床到岸都鋪石屎，斬咗原先古樹，喺石屎度鑿個窿種樖荔枝，最後破壞咗原先生態。

而荔灣湖嘅荔枝結唔出果，原因在於荔枝不過爲配合綠化而整，結果週圍種晒草同細葉榕，而荔枝要夠光夠肥，啲草爭肥，而榕樹遮光，啲荔枝因為營養唔夠結唔出果。

園林

昌華苑

内文：昌華苑

五代十國時，嶺南歸南漢。南漢後主劉鋹係暴君，遊歷荔枝灣時，因為當時荔枝灣開發到有啲規模，同時就喺興王府（廣州）隔籬，於是喺荔枝灣圈地起別苑供佢遊獵。按史料，當時起昌華苑啲簾、屋樑都係用珍珠、雲母、金銀裝飾，整條柱就要三千兩白銀。國庫虧空佢就落重稅、橫徵暴斂。荔枝熟時佢就同內臣妃子去玩，一留就半個月到過零月，叫做「紅雲宴」，呢種紅雲宴持續咗十年。之後宋滅南漢，昌華苑畀宋軍焚燬。

海山仙館

内文：海山仙館

荔枝灣最早嘅園林係唐朝嘅荔園，密集起園林係清朝以來嘅事。清嘉慶年間，廣州紳士邱熙喺荔枝灣墨硯洲鄭公堤嘅荔枝林度起咗處竹亭瓦舍嘅「虬珠園」，道光初年兩廣總督阮元嘅仔阮福同老友來玩，覺得花園同唐代嘅荔園有得比，於是換名「唐荔園」，寫篇「唐荔園記」。陳務滋當時重畫過兩幀《唐荔園》，從畫就睇出荔枝灣荔枝林濕地嘅景象。

道光十年（1830年）唐荔園破落，畀潘仕成買落做「潘園」，後來佢不斷拓建，最終成為廣州第一名園，據門口對聯「海上神山、仙人舊館」起名做「海山仙館」，係嶺南園林嘅巔峰之作。

荔香園

同治十二年（1873年）海山仙館充公，之後拆料變賣，有部分分割成彭園同荔香園。彭園喺而家廣州第二人民醫院後邊，因為主人係彭光湛而叫彭園。彭園清末時有振天聲劇團，民國時變成民居；彭園對岸係荔香園，主人陳花村，係汪精衛老婆陳壁君嘅陳家嘅人，後來荔香園開放，畀遊客入內，孫中山、廖仲愷、陳獨秀都來過，後來荔香園都毀壞咗。

市民遊樂

遊河

「遊河」讀jau⁴ ho²，係1920年代到1930年代興起嘅荔枝灣遊樂，夏天時啲人坐遊艇、舢舨喺荔枝灣度遊，有兩岸紅荔、一灣綠水、同埋荷香。除咗遊客嘅船，重有啲賣嘢食、賣河鮮、賣煙仔生果、賣藝嘅船，形成水上市場。因為荔枝灣盛產荔枝，遊客畀幾毫就可以上樹摘荔枝食。

喺20年代初，荔枝灣得少量渡艇同舢舨，大啲嘅叫「四柱大廳」。後來起好咗西郊泳場同海角紅樓，遊艇暴增，出現畫舫逐漸替代舢舨。畫舫船身油成天藍色，上面安個帳篷，兩邊掛條簾，中間擺啲檯凳。有啲畫舫自定名號，諸如「流雲」、「素月」、「清波」、「灌錦」，有啲重喺帳篷支柱掛番幅對聯。當時海角紅樓一帶嘅海係遊河終點，嗰度遊艇最多。除咗一般市民坐嘅畫舫，重有豪華嘅紫洞艇、酒菜艇。

艇仔粥嘅產生、水上買賣

據許廣平《記荔枝灣》，佢話廣州荔枝灣同杭州西湖、南京秦淮河齊名，喺佢印象入面，荔枝灣始終艇仔多多，每隻艇都滿人，好似魚群噉；荔枝灣雖然無打扮到靚靚嘅歌女，但有時會遇到啲盲妹揸隻艇仔過來問要唔要聽曲，呢時使幾毫子就可以聽支粵曲或者其他時興歌。賣粥人把聲好響，會有諸如「有無人要魚生粥？好靚魚生粥！」嘅唱賣，嗰啲粥艇喺艇上煲粥，行埋就見到艇仔度備好晒料（亦有啲河鮮係即場從河入面捕撈）、有爐有煲當場煲畀客食。呢個就係艇仔粥嘅由來，之後成為廣州有名嘅小食，而家一啲賣艇仔粥嘅粥檔，爲咗話自己正宗，會喺前面加隻字做「荔灣艇仔粥」。

荔枝灣嘅水上市場唔單有艇仔粥同賣藝，因為遊客多，各路商販雲集，重有賣河鮮嘅漁戶，賣生果、煙仔、零食嘅雜貨艇，連出租留聲機畀客喺遊河時聽嘅艇仔都有。入夏時節專賣荔枝同西瓜嘅艇尤其多。

高級遊艇

荔枝灣遊客有兩類，一類係畫舫遊客，就係啲普通市民、知識界、慕名而來嘅華僑，另一類係高級遊艇嘅富豪、權貴。高級遊艇有紫洞艇、酒菜艇，呢班人來遊船唔係爲遊河，而係攞個景做宴飲、賭博、嫖妓，亦有喺艇上行賄、交易等等。所謂紫洞艇，係一種樓船，一般有三層，雕樑畫棟，裝飾華麗，裏邊闊落舒適，擺設豪華，可以開幾十圍。

詩詞同文化影響

因為好耐以前就係廣州名勝，所以好多文人來過呢度，留低咗啲詩詞。因為地處西關核心，因為風景好，好多大戶人家喺荔枝灣地方住落，所以呢度彙聚咗好多諸如西關大屋、泮塘五秀、廣府飲食、粵曲等等廣府文化精髓。

• 張維屏

卓轉清溪宛若耶，樓船掩映樹週遮。

一灣荷葉碧於水，兩岸荔枝紅似花。

• 余藻華 《沁園春》

古之楚庭，浮邱寺西，陸賈城邊。有昌華舊院、仁威神廟、海山仙館、葉氏田園。

往事前年，滄桑幾度，代有風流事可傳。聊一試，把荔灣漁唱，譜入新弦。

• 朱光 《廣州好》

廣州好，夜泛荔枝灣。擊楫飛觴驚鷺宿，啖蝦啜粥樂餘閒。月冷放歌還。

揭蓋復涌

睇埋：荔枝灣涌

荔枝灣涌係2010年揭蓋復涌嘅西關涌嘅俗名，實際之前無呢個地名。

喺1992年條涌因為汙染發出惡臭，於是喺上面冚咗個蓋整成馬路，嗌荔枝灣路，條涌做咗地下暗渠，路兩邊變成古玩街。

2010年4月開始揭蓋復涌，去咗上面條路，清淨條涌，11月完工。而家荔枝灣涌分兩段，分別係揭蓋前嘅荔灣涌同揭蓋後新挖嘅荔枝灣涌，兩段都700米長，連通荔灣湖。

復涌後，涌上面起咗5條石橋方便交通，其中有3條沿用舊時「西關八橋」嘅名，從西向東呢五條橋係：龍津、德興（舊名）、大觀（舊名）、至善、永寧（舊名）。

而家荔枝灣涌變成廣州一處景點，附近嘅一啲文物都變成景區一部分。比如陳廉伯公館、蔣光鼐故居、梁家祠、文塔、仁威廟。

攷

• 廣州圖書館 廣州史記第12期 荔紅渺邈，苒苒物華休
• 傳說典故：荔枝灣和荔灣區