荔枝角

出自維基百科,自由嘅百科全書
跳去: 定向搵嘢
由填平嘅荔枝角灣望返荔枝角。中間美孚新邨就響荔枝角填地。

荔枝角Lai Chi Kok,亦寫Laichikok)係香港新九龍一個區,響長沙灣西面。荔枝角原本係海角,不過家下出面填晒海,已經睇唔到角。角嘅位置係響家下荔枝角羈留所,連住嘅山都係角嘅一部份。而隻角就係長沙灣呢個海灣末端。家下荔枝角同長沙灣就以蝴蝶谷道為界。近荔枝角道頭有條渠做分界。

荔枝角西面,原本都係個海灣,叫荔枝角灣,呢個灣響一步步填晒。香港政府未發展長沙灣已經發展荔枝角,而且響荔枝角灣兩角對出填海。荔枝角裏面有一個全港最大嘅私人屋邨美孚新邨,全條邨都響填海地上起嘅。塊地原本係美孚油庫(之前叫標準石油)。而灣西角就係魚雷庫。

荔枝角灣最後都係填平埋。過咗個灣,就係葵涌地界。不過荔枝角灣對上個山,雖然葵涌界內,但係因為無乜大村落,所以亦曾經當係荔枝角,荔景邨個荔就係指荔枝角,家下瑪嘉烈醫院地址都係寫荔枝角。