董建華

出自維基百科,自由嘅百科全書
跳去: 定向搵嘢
董建華
Tung Chee Hwa.jpg
出世 1937年7月7號
上海
職業 香港特別行政區行政長官
全國政協第十屆全國委員會副主席
配偶 董趙洪娉

董建華GBM1937年7月7號—)係政協第十屆全國委員會副主席,亦係第一、二任(第二任任期未完就請辭)香港特別行政區行政長官,亦即係香港主權交返畀中華人民共和國之後嘅第一位行政首長。

生平[編輯]

董建華1937年7月7號(同日發生蘆溝橋事變)喺上海出世,1947年成家人搬咗去香港落腳。1960年嗰陣佢喺英國利物浦大學攞到海事工程理學士學位,之後接手家族生意「東方海外(國際)有限公司」(香港交易所上市冧巴00316),到做咗特首之後先退出業務。

涉足政界[編輯]

1990年代初,董建華開始涉足政界事務。佢得當時香港總督彭定康請入香港行政局。喺得到江澤民嘅支持之後,四百人推選委員會選咗佢做特區嘅首任特首。但係响佢第一屆特首嘅五年任期(1997年2002年)內,香港出現經濟(例如1997年亞洲金融風暴、2000年科網股泡沫爆破)、公共衛生(禽流感)同政治危機,搞到民怨沸騰。而佢更被人話用人唯親(好似任用路祥安,搞出香港大學民調風波),亂出政策(好似八萬五房屋政策)。但係,就算係咁,响佢第一屆特首任期就嚟完嗰時,進行第二屆特首嘅選舉嗰陣,因為冇第二啲候選人攞到足夠選舉委員嘅提名,董建華結果喺呢次選舉入便,可以自動連任。

之後,聽講 [未記出處或冇根據]董建華順從北京中央政府意思,想夾硬通過香港基本法第23條嘅立法草案。嗰條草案將好多香港同其他世界先進地區一路都有嘅自由同埋人權,睇做叛國、分裂國家、顛覆等嘅重罪。再加上佢個政府喺處理非典型肺炎(沙士,SARS)嗰陣聽信廣東省方面提供嘅假疫情,冇睇到問題嘅嚴重性,搞到有299人死咗,包括唔少醫護人員。香港人忍無可忍,終於響2003年7月1號發動咗1989年之後香港最大型嘅街頭遊行七一大遊行,有大約50萬嘅香港人着黑衫,要求董建華落台,同響2007年2008年進行雙普選(行政長官、香港立法會)。

呢次遊行影響深遠。香港行政會議成員、自由黨田北俊因遊行而轉軚反對立法,終於令23條草案過唔到。而負責23條立法嘅官員保安局局長葉劉淑儀,由民望第一跌到落包尾,受盡千夫所指,最後黯然落台。而董建華亦响第二屆任期未結束嘅情況下,喺2005年以健康(腳痛)為理由請辭,由當時嘅政務司司長曾蔭權接任。

全國政協十屆三次會議閉幕會上便,董建華畀人增選咗做政協第十屆全國委員會副主席。

屋企人[編輯]

董建華嘅老豆係叱吒一時嘅船王董浩雲,細佬叫董建成,夫人係董趙洪娉,最好嘅朋友係霍英東