蒙古人民軍
蒙古人民軍（蒙古文：Монголын Ардын Арми）係蒙古國嘅國家軍隊。去到2008年，蒙古人民軍嘅總兵力大約有兩萬人[1]。
史[編輯]
蒙古人民軍以1921年3月18號作為建軍日[2]，前身係蘇赫巴托爾同喬巴山領導嘅牧民游擊隊。1921年3月舉行嘅蒙古人民黨第一次代表大會決定合併所有游擊隊，建立「蒙古人民軍司令部」，作為武裝力量嘅領導機關。1921年3月18號，蒙古人民軍佔領咗恰克圖（家陣叫做阿勒拉坦布拉格），自此將3月18號定為蒙古人民軍建軍節。[1]
1921年末，蒙古人民軍將原先嘅團改成騎兵旅，實施旅團制；政府同時公布法令，要18歲至25歲的男人服兵役。1924年至1934年間，經蘇聯幫助，蒙古人民軍建成空軍、坦克、炮兵、通訊等等嘅兵種。1935年至1936年，蒙古人民軍響蘇聯紅軍嘅支援之下，先後多次擊退侵犯東部邊界嘅日軍。1945年8月，蒙古人民共和國對大日本帝國宣戰。[1]
第二次世界大戰結束之後，蒙古人民軍進行大規模裁軍，國防開支比重由1945年佔總預算嘅44.4%下降至2.9%。後嚟，蒙古人民共和國又重新擴充蒙古人民軍，1964年總兵力有1.4萬到1.5萬人。1972年，蒙古人民軍嘅總兵力有4.7萬人，其中陸軍2.8萬人，公安部隊1.8萬人，空軍1000人。[1]
蒙古人民軍嘅最高統帥係大人民呼拉爾主席團主席，國家最高軍事決策機構係國防會議。蒙古人民軍嘅最高領導機關係國防部，下設有總參謀部、政治部、幹部部、後勤部、軍訓部、陸軍部、空軍處等等嘅單位。[3]
1992年，蒙古人民共和國改名做蒙古國。依照《蒙古國憲法》，蒙古國總統兼任武裝力量總司令。1992年起，服役期改成一年。[1]