蓮茸包

因喪事而宴客嘅壽包係白色，圖中呈粉紅色嘅屬壽宴用嘅生日包，同壽桃功用相同。

粵式酒樓所供應嘅蓮蓉包

蓮茸包，俗寫蓮蓉包，係有餡包嘅一種，係廣東、香港同澳門地區常見嘅點心。餡由蓮茸造。通常茶樓或者酒樓有得賣。蓮茸包除咗原本蓮茸做餡，後尾重有白蓮茸做餡。

做法

蓮蓉包係將湖南湘蓮以豬油搓成蓮蓉，加糖同油攪拌成嘅餡，放入中式白蒸包嘅「皮」入面，喺蒸籠裏蒸大概十五分鐘就得。

變化同衍生

壽桃同 壽包都係蓮茸包嘅一種。

粉紅色嘅包身就好似蟠桃一樣，紅事（喜慶場合，好似生日宴會）用。

喺喪事（白事）後解穢酒用嘅壽包，色白，冇紅印。

而喺傳統嘅稱謂上，用喺壽宴嘅壽桃包稱為壽桃；用喺白事嘅稱為壽包。

但事至今日，香港嘅酒家業界，乃至普羅大眾，已經撈亂兩者嘅稱呼，將兩者都簡稱做壽包。

壽桃包（點心版）

作為香港茶樓點心，壽桃包通常係白色包身，更日益進步似壽桃形狀（中間佔半長度有微微直紋，包身一邊成尖細狀），頂部表面為淺粉紅色。有啲茶樓嘅版本，除蓮蓉餡外更有咸蛋黃。

有啲點心專門店嘅小壽桃包只有蓮蓉餡而無咸蛋黃，大壽桃包先有咸蛋黃。