蝦餃

蝦餃

蝦餃係廣東具代表性嘅點心，以一層澄麵皮包住一至兩隻蝦為主餡，份量大細多數以一啖為限。傳統嘅蝦餃係半月形、蜘蛛肚共有十二褶嘅，餡料有蝦，有肉，有筍，而家流行嘅係獨蝦蝦餃。優質美味嘅蝦餃一定要皮薄而軟，如果餃皮係半透明就更好；蝦要爽口彈牙，餃內有少量汁液，成隻餃就要夠熱為最佳。

起源

蝦餃嘅起源地，有人指出係廣州漱珠崗附近五鳳鄉嘅怡珍茶樓。最早嘅蝦餃被叫做「五鳳鮮蝦餃」，誕生時間喺1920年至1930年之間。