西樵山
西樵山係中國廣東，佛山南海區裏面一座山，喺佛山市區西便。西樵係座死火山，山齡四五千萬年。距廣州市區68千米。個山雖然唔算高，不過就俾共和國劃做國家重點風景名勝區、國家森林公園同埋國家地質公園。西樵山佔地14平方千米，有72峰。佢主峰高346米。西樵自然山秀，古人類曾經住過呢處，而且亦有唔少文人到過，亦係宗敎聖地，文化底藴深厚。
西樵山一帶，好多時就咁叫西樵。北便原本叫官山墟嘅小鎮，都改咗名叫西樵鎮，管住西樵山周圍，即係西江，同埋接住北江嘅順德官窰涌之間嘅地方。
目錄 |
[編輯] 地質
珠江三角洲一帶，遠古係個海灣。四五千萬年之前，有次海底火山爆發，噴出大量溶岩，溶岩喺海中間凝結，造咗個錐形山，呢個就係西樵山嘅雛形。之後呢一帶火山爆完又爆，溶岩變成72峰，火山亦都逐漸變成死火山，再經幾千萬年風化侵蝕，先變成今日咁樣。西樵山周圍原本嘅海，經過咁多年，都變晒成沖積平原，即係家下叫嘅珠江三角洲。所以西樵山就好似喺平地突起嘅山。山上面生晒啲花草樹木，所以先咁蒼翠。
[編輯] 史
[編輯] 景色
西樵山至特色係佢奇峰怪石同埋流泉飛瀑。西樵山有72峰，主峰大秤峰高海拔346米，成個峰羣喺珠江三角洲百里平川拔起，直聳空庭，清幽秀麗。西樵山上重有42洞，同無數奇崖怪壁，比較有名嘅有九龍岩、冬菇石、燕岩等，姿態萬千，精美絕侖。西樵山林深苔厚，岩石裂隙縱橫，儲水豐富，泉眼共232處同瀑布28處，比較出名係“雲崖飛瀑”同“飛葉清泉”。其中大清時，“雲崖飛瀑”重係“羊城八景”之一，稱之為“兩樵雲瀑”。
[編輯] 人文
6000到8000年前，西樵山就有人類活動，考古學家叫佢做“西樵山文化”，又叫做“雙肩石器文化”。啲人整出來嘅細石器同埋雙肩石斧精細實用，影響咗珠江流域嘅原始文明。大明同大清嗰時，包括湛若水、何白雲在內一大批文人先後隱居西樵山，喺度探求理學，吟詩作畫，西樵山成為南粵理學探究之地。當中最出名嘅莫過於康有為，佢後生嗰時，就係西樵山出來，及後搞咗百日維新。西樵山重係南拳宗師黃飛鴻發源地，黃飛鴻百幾年前就喺呢處出世，苦煉武功，修心養德，成為武術宗師。現代文人墨客好似秦牧、黃施民、郭沫若等，都喺處留過詩。
[編輯] 文化
西樵山宗教上，集合咗佛、道、儒三敎。山上有尊高61.9米觀音座像，係世界至高嘅觀音座像。觀音坐正喺西樵山第二高峰，即係大仙峰上便。西樵山嘅民俗，以廣府文化為代表，村民婚嫁習俗，生活習俗都好特別，民風古樸，民間藝術最特色嘅有“半山扒龍舟”，“阿婆扒龍舟”、“新年獅藝”等。西樵山飲食文化係正宗粵菜文化，全魚宴同西樵蛇宴都係出名嘅粵菜。野菜係西樵另一種山野特色，西樵野菜有走馬風、紫貝菜、佛手瓜等。除此之外，西樵嘅竹、茶、陶、中藥都好有當地特色。
[編輯] 參攷
- 《珠江文明的燈塔——西樵山》，深圳新聞網，2002年12月27日。
- 姚德榮：《一枝獨秀南海西樵山》，網易，2005年12月6日。
