觀塘

出自維基百科,自由嘅百科全書
跳去: 定向搵嘢
觀塘同仁街
觀塘物華街
瑞和街街市

觀塘,原本叫做官塘,係香港新九龍東面一個地方,靠近維多利亞港。觀塘響牛頭角油塘之間,係香港第一代嘅衞星城市,發展後一直係商工住兼備嘅地方。官塘原本係一個海灣,附近有鹹田,即係後來嘅藍田。觀塘係觀塘區嘅核心。

歷史[編輯]

觀塘最早歷史記載可以追尋至北宋。當時觀塘一帶起咗一個官方鹽場,名為「官富場」,並由鹽官主理,係當時東莞縣內四大鹽場之一。南宋孝宗隆興元年(1163年),「官富場」產鹽量未如理想,曾一度廢置,後來因鹽產量升番先至恢復設置。

元朝時期,「官富場」被改為「官富巡司」,喺明朝時則被改為「官富巡檢司」。直到康熙元年(1662年),清朝政府為咗防止沿海居民接濟位於台灣鄭成功政權,因而實行遷界令,使到沿海居民向內地遷界五十里,鹽場亦因而被廢置。雖然遷界令喺康熙八年(1669年)取消,不過由於搬嚟嘅居民唔係太識煮鹽,鹽場恢復唔番昔日規模,其後卒之都被廢置。

呢個鹽場為該地區帶來「官富」一名,亦有居民稱之為「官塘」(官富鹽塘)。1953年至1954年起,香港政府開始發展嗰帶成為香港主要工業區,開始用「觀塘」呢個名。1979年,香港地鐵通車,起咗「觀塘站」,令觀塘成為該區嘅最普遍稱呼。

規劃[編輯]

1950年代之前嘅觀塘係一個幾荒蕪嘅海灣。第二次世界大戰之後部份由中國南下嘅廠家開始喺觀塘設廠,於是1954年香港政府喺觀塘對出海面展開填海工程,騰出土地畀廠家,並喺1957年完成。填海部分(即係觀塘南部)作為工業用途,變成觀塘工業區,而工業區嘅北面就發展為住宅區,當初包括秀茂坪。最初嗰陣觀塘工業區淨係設有架空電線,1960年先至改為地底電線。

隨觀塘嘅人口越來越多,唔少公共屋邨都喺觀塘落成,包括牛頭角邨藍田邨秀茂坪邨等等,而秀茂坪山上更有順利邨等一眾屋邨嘅興建,稱為「四順區」。1970年代觀塘隨住工業發展而帶來大量車流,香港政府起咗地鐵觀塘綫

踏入1990年代,隨住製造業「日落西山」,大量工廠空置,觀塘地鐵站附近一段部分改建成商業大廈或貨倉,但沿海一段則大多空置。而觀塘唔少住宅大廈亦日趨老化,當中牛頭角邨、藍田邨、秀茂坪邨等公共屋邨全部重建。其他私人住宅亦都係一樣,就咁樣喺1998年年初,土地發展公司(今日嘅市區重建局)提出建議觀塘市中心重建項目,但重未實施。到咗2005年11月,市區重建局宣佈成立觀塘分區諮詢委員會,準備落實方案。而房委會亦發表,希望喺油塘社區發展類似太古城嘅綜合式社區發展,以配合居民生活所需。

[編輯]

觀塘區住宅發展主要喺公共房屋居者有其屋屋苑,得 30% 喺私人樓。由於觀塘區發展嘅歷史久遠,較舊嘅屋都俾新起房屋取代。藍田邨喺九十年代被人拆咗,比新型公屋取代。最近,市建局亦發表咗觀塘裕民坊重建計劃,重建日久失修同樓齡高嘅大廈。

醫療[編輯]

觀塘區內醫院只得有急症室基督教聯合醫院一間。此外區內亦有長者健康中心、婦女健康中心、胸肺科診所、兒童體能智力測驗中心、皮膚科診療所、牙科街症服務診所、學童牙科診所、社會衞生科診所各1間;母嬰健康院與美沙酮診所各2間、及3間學生健康服務中心/健康評估中心。

教育[編輯]

區內有56間幼稚園;48間小學;32間中學;4間特殊學校;3間成人教育中心;1間醫院。為配合秀茂坪及油塘新發展區,均已預留位置起更多學校。