觀鳥園

觀鳥園，又叫做大鳥籠，係一個大型觀鳥場所，係一個可容納一種或多種雀鳥飛行同棲息嘅空間。一般觀鳥園內都會栽種植物同營造自然環境，以配合雀鳥或遊客嘅需要。

由於雀鳥嘅價錢比哺乳動物平，加上養佢哋同保護佢哋嘅方法亦較簡單，所以十六世紀開始，鳥舍主人（多數係貴族）開始改養雀鳥，觀鳥園亦都應運而生^[1]。

種類[編輯]

公眾性嘅觀鳥園[編輯]

一般嘅觀鳥園可以喺眾多嘅公園或者動物園裏面搵到，而大型嘅觀鳥園裏面亦設有一條高架行人道，可以畀遊客穿梭喺園內樹冠同自然環境之間，就以香港為例，位於香港公園範圍嘅尤德觀鳥園，係以尤德爵士（1982年至1986年間任香港總督）命名嘅，喺1992年9月開放；海洋公園近大樹灣入口嘅「百鳥居」，亦都係同類設施，喺1987年5月開放^[2]。

歷史[編輯]

自遠古時代，人類為咗從雀鳥中得到食物，就開始困住佢哋嚟養，之後開始由食用改為觀賞用，部分嘅觀鳥園亦演變為雀鳥繁殖同教育中心，為雀鳥進行保護計劃。16世紀之後嘅歐洲，因為雀鳥比猛獸價錢平，管理又較易，亦逐漸成為動物園嘅飼養主流。

歷史最悠久嘅觀鳥園喺倫敦動物園，喺1829年建造。而設喺荷蘭鹿特丹動物園嘅大型觀鳥園，亦有相當長嘅歷史（1880年）。

喺美國，史密森尼動物公園喺1902年亦打造一間大型嘅觀鳥園^[3]。美國聖路易斯動物公園亦打造咗全世界規模最大嘅動觀鳥園。世界上最古老嘅動物園之一：比利時安特衞普嘅動物園，亦建設過咗一幢「雀鳥大樓」，亦係一種獨特嘅觀鳥園^[4]。法蘭克福動物園嘅觀鳥屋喺1961年建成，佢利用玻璃分隔雀鳥，可以見到翠鳥捉魚食嘅過程。

位於南非嘅「伊甸鳥園」，亦可能係現時最大嘅觀鳥園，佢喺2005年建造，裏面養咗200種逾3000隻唔同品種嘅雀鳥。