詹培忠

詹培忠（CHIM Pui-chung，1946年—）係現任香港立法會議員，來自廣東潮州。

[編輯] 事業

詹培忠祖籍廣東潮州，9歲落嚟香港，中學畢業。23歲開始炒股票。1980年因協助佳寧上市而成名，畀人叫做「金牌莊家」同「公司醫生」。1998年因被控偽造文件罪名成立，被判入獄而失去議員資格。1999年出獄。

詹培忠響1991年至1998年曾經代表金融界及金融服務界為立法會議員，往往語出驚人，好似初當選時指保險界一票都冇投畀佢，所以唔會代表保險界響立法會爭取利益；又曾經話「十個女人十隻雞（十個女人十個都係妓女），老婆係隻私家雞（老婆係私家妓女）」等等。

2004年響金融服務界功能組別選舉中贏出，重返立法會。

2005年5月，詹培忠宣布參與2005年香港行政長官選舉，成為第二位參選人，但最終未能取得100位選舉委員會成員提名（只取得21票），而宣布放棄參選。

2005年 12月21日，就香港政府2007年、2008年行政長官及立法會嘅選舉方案，詹培忠響辯論時仍堅稱會投棄權票，但喺第一個議案表決時就投咗贊成票。

2009年7月5日，詹培忠於港台城市論壇中唔滿意發言被打斷，中途離場抗議，為城市論壇三十幾年來首次有嘉賓離場抗議。

2010年1月7日，詹培忠喺立法會同黃毓民嗌架，期間向佢承認自己係「死監躉」，會議被迫暫停。佢事後接受傳媒訪問時，同黃毓民握手言和，並指佢哋兩個係多年好友。

詹培忠鍾意去各國賭場玩，曾經贏過幾百萬美金。2005年佢同老婆、朋友4次去美國賭城耍樂，有報道話佢一共贏咗400至500萬美金（近3,000萬港元）。^{[需要參考資料]}詹培忠嘅12字贏錢真言係：「贏谷、輸縮、心清、數熟、夠毒、知足」。

2006年9月9日，詹培忠同老婆從珠海前往澳門永利酒店，入住日租20,000港元嘅貴賓套房，響賭場貴賓廳同莊家對賭百家樂，贏咗200幾萬港元。但詹培忠曾經形容賭博係「十賭九輸」，勸賭徒緊記佢嘅12字真言，甚或及早收手，回頭是岸。

2007年7月7日，詹培忠向傳媒披露，喺今年三月發現頸部右邊有一粒腫瘤，四月初證實嗰粒腫瘤係惡性，即係俗稱嘅「頸癌」。佢已經接受「電療」同「化療」，體重由160磅，下降12磅至148磅。