變調

出自維基百科,自由嘅百科全書
跳去: 定向搵嘢

變調係有聲調語言經常見嘅現象,指某啲字喺特定嘅場合之下,會讀成第二個調,但係單獨用時通常會讀返本調,而字典標音亦會用本調。

規則類別[編輯]

唔同嘅語言,變調嘅法則都唔同,各具特式。變調規則包括以下類別:

  • 辭彙:變調與否,視乎個別詞語而定,並無簡單規律,基本上要編一本辭典逐個詞語記錄低。粵語嘅變調,以此為主。例如:地名「長沙灣」個「灣」字本調係第一聲,讀「彎」(waan1),但係喺呢個詞裏面,就一定要變調成第四聲,讀「環」(waan1→4),但係「淺水灣」個「灣」,又只會讀「彎」,唔會讀「環」。又如:「揾錢」個「錢」(cin4→2)字、「啤梨」個「梨」(lei4→2)字,都要變調讀第二聲,但係呢兩個字,喺「金錢」、「雪梨」兩個詞入面,又會用返本調第四聲來讀。由此可見,呢類變調並無簡單規律,個個詞都唔同。
  • 語音環境:如果一堆字連續讀出來,聲調「蠱怪」、「難發音」嘅話,中間某啲字就會變讀其他調,咁樣聽落會「順耳」啲,講嗰陣會「順口」啲。致於何謂「蠱怪」、「難發音」、「順口」、「順耳」,則視乎語言而定,並無跨語言嘅通則。例如國語將連續兩個第三聲嘅字,視為「唔順耳」、「難發音」,所以會將第一個字變調讀成第二聲(3→2),咁樣會「易發音」、「順耳」。不過,粵語就無呢一類變調,例如即使連續兩個字讀第四聲,都唔會變調 :「麻煩」、「明明」、「神靈」,一啲都唔覺得「難讀」、「唔順耳」。
  • 詞組:有啲語言,每個多字詞裏面都會將某啲字變調,其他字保留讀原調。例如閩南話會將詞裏面孻尾個字讀原調,其餘就按特定嘅規律變調。上海話就調返轉,將詞語嘅首字讀原調,其他字就變調成類似北方話輕聲嘅調。呢類語言,一用到多字詞就必然會變調,變調當食生菜。粵語就無呢一類變調。

粵語嘅變調[編輯]

雖然粵語嘅變調屬辭彙變調一類,無乜規則,但係根據發音語意,亦可以歸納出幾種:

  • 變高上調:變調後,讀成第二聲。呢一類最常見。
    • 例子:
      • 耳環(ji5 waan4→2)
      • 男人 → 「男忍」(naam4 jan4→2)
      • 港女 (gong2 neoi5→2)
      • 眼鏡 → 「眼頸」(ngaan5 geng3→2)
  • 變高平調:變調後,讀成第一聲,通常略帶貶義。
    • 例子:
      • 今晚(gam1 maan5→1)
      • 自己 → 自機(zi6 gei2→1)
      • 一個人 → 一個因(jat7 go3 jan4→1)
      • 工廠妹 (gong1 cong2 mui6→1)
      • 蠄蟧絲網(kam4 lou4 si1 mong5→1)
      • 最尾(zeoi3 mei5→1)
  • 其他:難以歸類。