超級馬利奧樂園3 華利奧樂園

出自維基百科,自由嘅百科全書
跳去: 定向搵嘢

超級馬利奧樂園3 華利奧樂園(日文:スーパーマリオランド3 ワリオランド;英文:Wario Land: Super Mario Land 3)係任天堂1994年1月21號Game Boy出嘅超級馬利奧樂園系列作品。

佢係第一隻由華利奧做主角嘅遊戲,亦係Captain Syrup(キャプテン・シロップ)同佢嘅馬仔Brown Sugar Pirates首次出場嘅遊戲。

雖然係叫「超級馬利奧樂園3」,但係馬利奧喺呢隻遊戲絕少出現。

簡介[編輯]

華利奧樂園嘅故事係超級馬利奧樂園2:六個金幣(華利奧係呢隻遊戲嘅最後大佬)嘅延續。同之前嘅超級孖寶兄弟系列作品唔同,遊戲冇公主要救,而目的係令華利奧搵到越多嘅錢去買城堡,令馬利奧妒忌。另外華利奧亦可以儲「心」,儲到咁上下就可以獎隻。

成隻遊戲有40關(包埋隱藏嗰啲)。其中多個關有隱藏嘅寶箱,而嗰啲地方要用到鎖匙先至入到去。每個寶箱都有唔同嘅寶物,而寶物亦有唔同價值。

[編輯]

華利奧嘅行動方式同馬利奧有唔同,其中之一係佢就噉掂啲敵人自己都唔會有事(掂到佢哋啲武器除外),而佢踩到敵人之後,重可以將佢哋拎起當武器用。

如果佢有10個或以上嘅錢,華利奧可以攞出一個值10個錢嘅銀仔,去開終點大門、開Check point又或者當武器用。佢掟出去嘅銀仔係可以收返。

華利奧可以攞一啲帽嚟同自己升級。噴射帽令佢可以喺個天飛一段距離、走得快啲,亦可以喺水入面用衝撞;火龍帽令佢可以噴火攻擊,就算落咗水都出到;牛角帽令佢更加大力,可以衝撞多一段距離、吊喺天花板同埋出重磧。另外,華利奧亦可以攞星星令自己變成無敵一段時間。

如果華利奧中招,就會縮細、冇帽戴同埋冇得出衝撞。喺縮細咗嘅情況下再中招就會死同埋跌晒喺嗰關搵到嘅錢。