越南話

越南話（Tiếng Việt）係越南京族嘅話，又叫做京語（越南話拉丁文字寫法：Tiếng Kinh；越南話喃字寫法：㗂京），係越南主要語言。越南話同廣東話一樣，都係聲調語言同分析語。主要文法同廣東話差唔多，主要唔同係，越南話修飾詞習慣擺喺名詞同動詞嘅後便，點同國語相反，而廣東話，就介乎越南話同國語之間。語言學分類上，越南話劃入南亞語系孟-高棉語族，呢種劃分係家下學術界嘅主流意見。亦都有唔同嘅劃分意見，認為越南話應該劃入漢藏語系侗台語族。所以家下嚟講越南話嘅分類歸屬重有得拗。

聲韻

內文： 越南話聲韻

越南話同廣東話一樣，一個字一粒聲。亦都同廣東話一樣有 -p -t -k -m -n -ng 呢六種塞音尾，聲調格局為六聲八調（標準廣東話就六聲九調）。啲字音方面，越南話同廣東話好似，同史上兩種話間影響有關。

文法

基本文法係SVO型，文法上，修飾動詞嘅成分，要擺喺動詞後便，呢幾點同廣東話一樣。當中語法特點，係形容詞習慣擺喺，要修飾嘅名詞後便，就好似廣東話入便嘅「椰青」、「豆腐膶」、「雞公」噉。廣東話反轉過嚟「紅花」、「白菜」都得，越南話就較少，除非係外來詞，譬如由中國引入嘅詞。所以嚮越南話入便，「越南話」習慣掉返轉嚟講，「語越南」（Tiếng Việt Nam/㗂越南）。

書寫

以前越南話一路用漢字寫，加啲自己創制嘅字，叫做喃字（Chữ Nôm／𡦂喃），夾雜嚮傳統漢字中間，就同而家嘅廣東話書寫情況差唔多。後尾法國人殖民越南，為咗排斥中國對越南嘅傳統影響，割裂越南同中國嘅歷史文化聯繫，啲法國傳教士創制咗拉丁字母嘅越南文，由殖民當局同傀儡政權推廣，同時禁止漢字同文言文行文，令到傳統漢字書寫方式式微。20世紀中期之後，越南當局推行法國傳教士創制嘅拉丁字母越南文，廢止咗漢字同喃字。而家嚮越南嘅寺廟同舊皇宮先至睇得到漢字。非常之有意思嘅現象係，越南人同中國人一樣過年貼對紙。以前用漢字嗰陣，用漢字寫對聯，書法亦都用毛筆，廢止漢字之後，有啲人就用圈嚟代替漢字，喺門口兩邊各貼一張紅紙畫好多個圈代替漢字；亦有人用拉丁字母嘅越南文嚟寫對聯，睇落去極之騎呢。

方言

越南話嘅方言情況較廣東話簡單，分南、中、北三隻。南部方言嘅代表音係西貢話，中部方言嘅代表音係順化話，北部方言嘅代表係河內話。