趙元任
趙元任（1892年11月3號—1982年2月25號），字宜仲，江蘇省常州府陽湖縣（今屬武進縣）人，係中國出名嘅語言學家，中國科學社創辦人之一，亦都係中國語言科學嘅始創人，稱之為漢語言學之父。佢嘅六世祖係乾隆二十六年辛巳恩科進士，「江右三大家」之一嘅趙翼。
生平[編輯]
趙元任1892年喺天津出世，1900年返到常州青果巷住。1907年入咗南京江南高等學堂預科，並學習英文、德文同埋音樂，重學識多種漢語族語言同方言。1910年7月考到清政府遊美學務處招考嘅庚子賠款游美官費生。1910年8月入咗美國康乃爾大學，主修數學，選修物理同音樂，1914年大學畢業。1915年，參與發起中國科學社，同年考入哈佛大學讀研究生，修讀哲學，同時繼續選修音樂，1918年拎倒哲學博士學位。1920年8月從美國返咗中國，喺清華大學任教。[1]
1920年哲學家伯特蘭·羅素來清華參觀講學，趙元任做羅素嘅翻譯，陪羅素周遊全國各地。每到一個地方，趙元任就用當地嘅方言來翻譯。1921年6月，趙元任同做醫生嘅楊步偉結婚。1925年到1929年，被清華國學研究院請咗去做導師，係當時時稱嘅四大導師（王國維、梁啟超、陳寅恪、趙元任）當中最後生嘅一位。1932年2月到1933年10月，任清華留美學生監督處主任。從1939年開始，先後做過美國耶魯大學訪問教授（1939年～1941年）、美國哈佛燕京學社《漢英大辭典》編輯（1941年～1946年）、美國語言學會會長（1945年當選）、美國海外語言特訓班中文主任（1943年－1944年）、美國密歇根大學語言研究所教授（1946年－1947年）。從1947年起，專任美國加州大學教授，1965年退休之後，留任榮休教授直到過身。趙元任重做過康乃爾大學物理系講師、哈佛大學哲學系講師、教授、中央研究院歷史語言研究所研究員兼語言組主任等。
1948年之後，喺國外任教嘅時候，趙元任嘅英文著作有《中國語字典》、《粵語入門》、《中國語語法之研究》、《湖北方言調查》等。50年代後期，佢曾經喺在台北作「語言問題」嘅系統演講，並結集成書，由商務印書館出版。此外，佢亦都錄製過有關語言嘅唱片，單係中國華中、華南各省方言嘅錄音唱片，就有2000幾張。1965年退休之後，佢重出版咗有《語言學跟符號系統》、《中國話的文法》、《白話讀物》等。此外重有《綠信》（green letter）五冊，記述自己的思想、感情同生活。佢重將《康熙字典》裡面嘅兩萬幾個字，「濃縮」成2000個常用字，起名做《通字方案》。佢重發明咗五度標音法。
語言天分[編輯]
1904年，趙元任父母先後過身，俾人送咗去蘇州，學識咗蘇州話。
1905年，趙元任返到常州由伯母照管，伯母喺福州住過好多年，趙元任就從姖嗰道學咗少少福州話。同年，入咗私立溪山學校，學識英文。
1907年，趙元任入咗南京江南高等學校預科讀書，跟著美國人嘉化（David John Carver）學英文，選修埋拉丁文同德文，重學識咗南京話。
喺趙元任嘅《早年自傳》裡面，有一個關於佢當年為羅素翻譯嘅故事：趙元任同羅素一行途徑杭州、南京、長沙，然後上去北京。趙元任就利用伊個機會「演習」佢啲方言，喺杭州就用杭州方言翻譯羅素嘅講詞。去湖南長沙途中，喺江永輪上面有湖南贊助人楊瑞六，趙元任喺佢道學了啲湖南方言。10月26日晚，趙元任翻譯咗羅素嘅講詞，講完之後，一個學生走上來問佢：「你係焉個縣㗎？」當時趙元任學湖南話重未夠一個星期，個學生已經以為佢是湖南人，官話講唔好，實際上佢識說官話，但係湖南話就講唔好。
作家吳組緗1930年代喺清華大學中國文學系讀書。第一堂課趙元任點名，見到吳組緗嘅鄉下是安徽涇縣。上完課之後，趙元任就搵吳組緗傾蓋，重請佢去自己屋下坐。就咁樣，吳組緗以後每日落課就去趙家食飯，趙元任就虛心咁向吳組緗求教安徽方言，完全無老師嘅架子。一個星期之後，趙元任就掌握咗吳組緗鄉下嘅方言。趙元任就係咁隨時學習研究中國語言，不恥下問、謙虛向學，成為語言大師。
趙元任一世人學識咗33種漢語族語言/方言，識講英、法、德、日、西班牙文等好多種外語。佢自己話：「喺應用文方面，英文、德文、法文無問題。至於一般用法，就日本、古希臘、拉丁、俄羅斯等文字都唔成問題。」。有人將趙元任雙耳比喻成「錄音機」。
家庭生活[編輯]
1921年6月1日，趙元任同老婆楊步偉各請咗一位朋友來食飯，食完就方拿出結婚證書請兩位客人做證人，喺極簡單嘅儀式之中結為夫婦。
趙元任好怕老婆。楊步偉曾經講過：「兩公婆嗌起上來，如果大家都咁上下有道理嘅話，我係贏硬嘅！」趙元任從來唔同老婆爭高低，祇係幽默咁回答：「與其話係怕，不如話係愛；愛有幾深，怕有幾深。」
楊步偉喺花甲之年寫咗本英文自傳。自傳裏面傾到平時喺屋下焉個話事。楊步偉話:「我喺小家庭裡面有權，但係大事都重係畀我老公話事。」但係補充咗句：「祇不過大事好少，就係咁。」
跟著兩公婆生活好多年嘅侄仔話：「有時佢等兩個唔多唔少也有啲拗撬，因為姑媽把聲大，性格又急啲，姑丈就順姖，唔爭啦」。
著作[編輯]
- Chao, Yuen Ren. A Grammar of Spoken Chinese. Berkeley: University of California Press, 1968, ISBN 0-520-00219-9.
- 越元任：《漢語口語語法》，商務出版社，2002 (1979)，ISBN 7100022568。
- 《國語新詩韻》
- 《現代吳語的研究》
- 《廣西瑤歌記音》