軌距

軌距示意圖

軌距係鐵路軌道兩條鋼軌之間嘅距離（以鋼軌嘅內距為準）。國際鐵路協會喺1937年制定咗1435mm嘅標準軌距（等於英制嘅4呎8吋半），呢個軌距又叫做國際軌距。比標準軌闊嘅叫做寬軌，比標準軌窄嘅叫做窄軌。雙軌距鐵路或者多軌距鐵路舖咗三四條鋼軌，畀唔同軌距嘅列車行。

標準軌歷史

內文： 標準鐵軌

標準軌最先由使用鐵路嘅英國提出。設計同埋建造史托頓及達靈頓鐵路嘅英國工程師佐治·史提芬遜提出4呎8½吋嘅軌距，並成功說服到火車製造商生產4呎8½吋（即係1435毫米）軌距嘅機車同車輛。由於史提芬遜成功設計嘅鐵路係眾人嘅模仿對象，令到呢個軌距流行。1845年英國皇家專員建議用4呎8½吋做標準軌距。1846年英國國會通過法案，要求將來所有嘅鐵路都使用標準軌。除咗英國嘅大西部鐵路（Great Western Railway）係用寬軌之外，英國嘅主要鐵路都係標準軌。大西部鐵路亦喺1892年改成標準軌。

有關4呎8½吋軌距嘅來源，有人認為喺古羅馬戰車嘅輪距。但亦有人指出可能係因為早期鐵路的軌道外側距離喺5英呎，而鐵軌頂寬喺1¾英吋，所以內側軌距就係4呎8½吋。

各國軌距

亞洲

台灣

台灣喺清佔時期起台灣鐵路嗰時，由英籍工程師建議之下揀咗1067毫米，咁同日本軌距一樣，令到之後乙未戰爭嗰時日軍一齊將火車頭運到臺灣做軍事用途行駛。台灣日治時期之後軌距都無變過，並陸續起好西部鐵路網。而其他產業鐵路（好似糖業鐵路同出名嘅阿里山森林鐵路）同埋東部臺東線都係用762毫米規格嘅輕便鐵道。

1958年，中華民國政府喺《鐵路法》入面規定以標準軌1435毫米做國家標準。但係臺灣早期嘅鐵路網因繼承日治時期嘅規劃，絕大部份都係1067mm或者係762mm軌距，所以亦都加註「有特別情事，經交通部核准者，不在此限」。1970年代臺東線嗰時配合起北迴線，改軌成為同西部一樣嘅1067毫米。都無用1435mm嘅軌距；一直到台北捷運、台灣高速鐵路、高雄捷運同埋台灣桃園國際機場捷運，臺灣先至出現標準軌距鐵道。

中國

火車喺中蒙邊境換軌

中國早期嘅鐵路由英國同比利時工程師承建，因為佢哋嘅軌距沿用英國標準，係標準軌。

中東鐵路曾經用過1520毫米嘅寬軌。山西嘅同蒲鐵路同正太鐵路曾經用過1000毫米（已經改造），雲南嘅昆河鐵路都重係1000毫米（米軌）。

中國而家用嘅係標準軌，1435mm。

香港

港鐵系統中，東鐵綫、西鐵綫、輕鐵同馬鞍山綫都係用1435mm嘅標準軌，而觀塘綫、荃灣綫、港島綫、東涌綫、機場快綫同將軍澳綫就用窄啲嘅1432毫米。

香港電車就用1067mm窄軌。而山頂纜車就用1520mm寬軌。

日本

日本嘅鐵路軌距主要係1067毫米（3呎6吋）。但亦有部份鐵道用762毫米、1372毫米（京王電鐵、東急世田穀線、函館市電、都電同都營新宿線）同埋1435毫米(阪急電鐵同各市市營地下鐵)。早期喺樺太軍用輕便鐵道用600毫米軌距。喺起高速鐵路（新幹線）嗰時就用咗1435毫米標準軌，以提高行車穩定性，但咁樣令到高速鐵路列車唔可以喺原有嘅路軌上面行，所以而家開發緊軌距可變嘅鐵路車輛。

印尼

印尼軌距主要係1067毫米。

東盟國家

東南亞國家，包括越南、柬埔寨、寮國、泰國、緬甸同馬來西亞以米軌（1000毫米）鐵路為主。越南河內去到中國邊境嘅同登之間鋪設咗標準同米軌雙軌距鐵路。計劃緊連接新加坡同中國嘅亞太鐵路會係標準軌，或者係標準同米軌雙軌距。

南亞國家

南亞國家印度、巴基斯坦、孟加拉及斯裏蘭卡嘅鐵路軌距不一，但多數都係1676毫米。印度而家計劃將所有嘅窄軌改做1676毫米。

美洲

美國及加拿大

美國及加拿大最初亦都用唔同嘅軌距，後來加拿大跟咗英國用標準軌。美國北部嘅鐵路因為最初多數都係由英國入口，多數都係標準軌。美國南部鐵路曾經以寬軌為主。南北內戰之後，南部嘅鐵路都慢慢變做標準軌距。

阿根廷及智利

阿根廷同智利嘅鐵路軌距係1676mm。

歐洲

歐洲大部分國家都係用標準軌（1435mm）。

愛爾蘭

愛爾蘭嘅軌距係1600毫米。

英國

北愛爾蘭嘅軌距係1600毫米。

倫敦地鐵軌距係1432毫米。

西班牙及葡萄牙

西班牙同葡萄牙嘅軌距係5呎5吋半。西班牙嘅正式標準係1674毫米，葡萄牙就係1665毫米，因為咁西班牙開發咗變距列車。西班牙喺度做緊改軌工程，將路軌改做標準軌距。

芬蘭

芬蘭喺19世紀係俄國轄下嘅大公國，用5英尺（1524毫米）軌距。

前蘇聯國家

19世紀嘅俄羅斯用1524毫米（5呎）寬軌，一般認為係出於軍事考慮，避免入侵嘅軍隊可以用佢嘅鐵路運輸系統。俄羅斯同屬於前蘇聯嘅國家，同埋蒙古、芬蘭都係用俄國嘅1520毫米軌距。比1524毫米窄4毫米，有時兩者嘅車可以互換，而南薩哈林州（庫頁島）就採用當時日本佔領南庫頁島時期嘅1067毫米（3呎6吋）軌距。

大洋洲

澳大利亞各州鐵路軌距

新西蘭

紐西蘭嘅鐵路為咗跨越中部山區地形，用咗1067mm嘅軌距。為咗克服呢個地形，需要好複雜嘅工程，好似著名嘅Raurimu螺旋。喺唔到4,000公里嘅軌道就有1787座橋同150個隧道。呢條軌道大概有500公里係電氣化嘅。

澳大利亞

澳洲本來係用標準軌，後來因為某啲原因而喺維多利亞省及南澳州出現咗5呎3吋（1600毫米）嘅軌距。部分地方亦有3呎6吋（1067毫米）嘅路軌。昆士蘭鐵路喺起嘅初期，用咗1067毫米（3'6"）嘅窄軌，喺全世界最大規模嘅窄軌系統。

非洲

南非及安哥拉、博茨瓦纳、剛果、加納等國多數用1067毫米軌距。

睇埋

• 膠輪路軌系統