軍種對立

出自維基百科,自由嘅百科全書
跳去: 定向搵嘢

軍種對立,係指一國軍隊嘅各個軍種(例如陸軍海軍空軍)之間嘅不和同競爭等等嘅對立關係[1]

原因同影響[編輯]

產生軍種對立嘅原因,包括海陸空軍等等嘅部門間競奪參謀本部嘅關鍵職位、爭取國防預算、特定任務嘅執行權又或者特定武器嘅擁有權[1],例如海軍響一次作戰中出動航空母艦,可能會被空軍視為對傳統職責嘅侵害。

軍種對立現象係本位主義嘅一種具體表現。類似嘅不和如果程度加劇嘅話,可能會對軍隊嘅效率同戰鬥力造成耗損。

各國嘅情形[編輯]

美國[編輯]

美國軍種對立嘅例子:參加2008年陸海軍對抗賽嘅美國海軍學院官校生大聲奚落入場嘅西點軍校學生。

響美國,近代軍種對立較早嘅一個著名案例,係響20世紀起頭嘅1900年代,當時首次開始永久性擔當遠征作戰同登陸作戰角色嘅美國海軍陸戰隊,響海軍同陸軍之間引發咗爭端。呢項叫做「前沿部署部隊」嘅概念,旨在令海軍陸戰隊嘅定位唔再限於十三州殖民地時期嘅船上警衞隊,而係發展為聯合性嘅海上登陸戰部隊。好多海軍軍官對於陸戰隊嘅任務性質產生困惑,並對於呢個單位係咪應該成為艦上部隊定係沿岸強襲部隊展開爭論,而美國陸軍軍官就擔心海軍陸戰隊踰越咗其先前嘅職責同角色。呢種紛擾持續咗超過50年。

美軍採用過幾種方法或者手段嚟管制同遏止軍種對立,例如《戈德華特-尼科爾斯國防部重構法案》喺1986年生效之後[2],針對希望晉陞嘅軍官追加咗要擔任過至少一個聯合勤務職位嘅條件。

日本[編輯]

二戰大日本帝國陸軍大日本帝國海軍嘅長期不睦,係軍種對立中最惡名遠播嘅案例之一,並且影響咗日軍響中國抗日戰爭同二戰嘅軍事行動;噉係因為陸軍係參照法國同德國嘅軍隊,而海軍係參照英國,令到兩者響發展路線方面有好大嘅差異[3];隨住日俄戰爭結束而進行嘅「帝國國防方針」入面,兩者又因為爭奪國防經費而對立[4]

日本天皇裕仁響《昭和天皇獨白錄》入面,都有提到日本係輸喺陸海軍之間嘅惡劣關係同作戰上唔一致[5][6]

其他國家[編輯]

  • 納粹德國:國防軍(即係海陸空三軍)同武裝親衞隊成日因為被排為同級而產生摩擦;空軍同海軍之間響二戰嗰陣都有一段時間喺若干議題上有分歧。
  • 英國:響英國皇家空軍創立之後,海軍同陸軍飛行隊因為響戰前擁有嘅飛機都被劃歸空軍之而不滿,最後係因應二戰局勢先令皇家海軍再次取得艦載飛機嘅指揮控制權[7]
  • 印度:陸軍同空軍之間已經因為互相爭奪攻擊用直升機嘅擁有權而內訌咗幾年[8]

參考[編輯]