部首

出自維基百科,自由嘅百科全書
跳去: 定向搵嘢

部首,係唐字分類法。唐字會跟形義分,每一部最基本形義嘅一個字做頭,就做部首,而部名就跟部首隻字。

部首係大漢時,許慎寫《說文解字》所創。說文解字嘅部首叫說文部首,有540隻。

家下多數唐字典嘅部首,係大清寫嘅《康熙字典》嘅部首,叫康熙部首,有214隻。佢係跟大明時,梅膺祚所編纂之《字彙》。康熙部首唔再拘泥意思為原則,將一啲少字嘅部打散,分去唔同部入便,所以康熙部首可以慳好多部首,唔使分得散咁難查。重有,部首之後再計字劃數,更加方便查字。不過因為無咁講究意思,有時某啲字塞入去嘅部,係有啲九唔搭八。

中國大陸日本都行減筆字,所以有啲字個形,好難搵康熙部首塞落去。甚至有啲部首連字都變埋,更加難歸部。中國大陸出版嘅大多數字典係跟拼音排,部首衹係用來做索引,所以同一個字有可能會喺幾個部首底下搵到。而喺日本,點歸部就睇本字典點分法。