阿維斯塔

出自維基百科,自由嘅百科全書
跳去: 定向搵嘢

阿維斯塔(Avesta)又叫做波斯古經,係瑣羅亞斯德教經典

阿維斯塔嘅意思,喺帕西語入面有知識或者福音嘅意思,而喺帕拉維語入面又可以解做「根基」或「原件」。

歷史[編輯]

《阿維斯塔》大概喺公元前 550年至公元前 331年嘅阿契美尼德王朝時期成書,最初《阿維斯塔》分二十一卷,八百一十五章。根據維什塔斯普國王御旨,用咗一萬兩千張牛皮紙,用金針寫咗一式兩份,由於用金針寫,所以《阿維斯塔》嘅文字又叫做「金字」。

《阿維斯塔》主要用「帕拉維語」寫成,「帕拉維語」即係古波斯語,有啲似印度吠陀文獻所用嘅梵語。

兩份原文《阿維斯陀》嘅其中一份,早已經喺希臘阿歷山大大帝東征時連王宮一齊燒咗,另一份就俾阿歷山大帶咗返希臘,之後佢將書入面關於醫學、天文學同哲學方面嘅內容翻譯做希臘文之後,就將原文燒毀。所以《阿維斯陀》原文已經失傳,只有希臘文嘅部份譯本。

因為咁,對於《阿維斯陀》原文嘅各種研究喺嚴重缺乏史料下,有關《阿維斯塔》嘅好多背景其實都係推斷出嚟。

雖然喺薩珊王朝重新修訂過,修復咗大部份《阿維斯塔》,但係喺阿拉伯統治時期,又喺戰爭同異教逼迫入面毀壞咗好多,而流傳到而家嘅《阿維斯陀》就只係得返薩珊王朝時期嘅四份之一咁多。

內容[編輯]

而家嘅《阿維斯塔》內容分為六個部份,分別係:《伽薩 Gatha》、《亞斯納 Yasna》、《維期帕拉德 Visparad 》、《亞什特 Yasht 》、《萬迪達德 Vandidad 》、《胡爾達‧阿維斯陀 Khordah-Avesta 》

伽薩 (Gatha)[編輯]

又叫做「瑣羅亞斯德之歌」,係阿維斯陀最古老嘅部份,估計成書大約喺公元前十一世紀。伽薩嘅文字採用詩體,加上時代久遠,而且內容以哲理為主,所以就算專家,都唔係咁易睇得明。

關於伽薩嘅內容,主要係解釋善惡二元嘅宇宙觀,對於世界本源、形成同結局嘅睇法,以及由呢種二元論發展出嘅道德觀,世界觀同人生意義。

亞斯納 (Yasna)[編輯]

「亞斯納」意思係「值得頌讚」,喺遠古雅利安人眼中,「值得頌讚」就即係話凡係有益、純善、永恆,都係值得頌讚,由於自然界諸神都有唔同優良道德品格,所以能夠作為人類信仰同崇拜嘅對象。而亞斯納嘅主要內容,就係頌讚呢個世上所有美好事物同現象。

亞斯納有好多神話故事,包括太陽神密斯拉、雨神泰斯特里亞、安娜希塔女神……等。

維期帕拉德 (Visparad)[編輯]

「維期帕拉德」意思係「所有首領」。凡係帶嚟福利、有益於生活、會畀人增加歡樂幸福嘅善神、善行同善嘅造物,都相對於招致災禍、破壞生活,帶畀人類痛苦悲傷嘅惡神、惡行同惡嘅造物嚟講,都係優秀、傑出同上等,而維期帕拉德就係頌讚呢啲善神、善行同善嘅造物。

由於維期帕拉德入面有好多對於祭祀用品、禮儀等描述,所以又叫做「祭儀書」。

亞什特 (Yasht)[編輯]

亞什特同亞斯納嘅主旨大致相同,都係以頌讚天神為主,分別在於亞斯納主要係善神喺意義上嘅頌讚,而亞什特就喺具體上頌讚比較重要嘅天神。

亞什特係現存《阿維斯陀》入面篇幅最長,亦係最生動有趣嘅部份,佢有大量原始神話同喺神話基礎上改編而成嘅雅利安人帝王英雄傳說,係瑣羅亞斯德教神話體系中重要部份。

萬迪達德 (Vandidad)[編輯]

「萬迪達德」意思係「趕鬼方法」,喺瑣羅亞斯德創立瑣羅亞斯德教之後,當時好多原有宗教針對瑣羅亞斯德教而進行攻擊,萬迪達德呢個名稱就係針對呢啲攻擊瑣羅亞斯德教嘅異教而起。

而家嘅萬迪達德總共有二十二章,其中第 4 至 17 章主要講教徒應該點遵循禮儀同戒律,例如遺反教規應實行嘅各種懲罰,以及應點樣處理屍體、怎樣避開唔潔淨嘅嘢、點樣醫病同點樣懺悔、贖罪等,可以話係一本律法書。

胡爾達‧阿維斯陀 (Khordah-Avesta)[編輯]

「胡爾達」即係「小」嘅意思,胡爾達‧阿維斯陀嘅意思,就即係精簡版嘅《阿維斯陀》,原本唔屬於阿維斯陀,而係喺薩珊王朝時嘅修定版,但由於好多《阿維斯陀》原著已經失傳,而精簡版嘅《阿維斯陀》又保留咗一啲失傳部份,因為咁而令胡爾達‧阿維斯陀變得重要。

參考[編輯]

  • 《阿維斯塔:瑣羅亞斯德教聖書》 商務印書館 ISBN 7100040841/B·593
  • 《二元神論─古波斯宗教神話研究》 中國社會科學院出版社 1997 ISBN 7500421745
  • Zoroastrians: Their Religious Beliefs and Practices ISBN 0415239036

[編輯]