陳嘉庚

陳嘉庚像

陳嘉庚（1874年10月21號—1961年8月12號），係中國出名嘅愛國華僑領袖，福建同安集美人，祖籍河南固始，曾經喺南洋大搞生意，同時亦積極興辦教育，先後創辦廈門大學同集美大學。為咗令集美大學有穩定經費來源，陳嘉庚1947年喺香港創辦集友銀行，將股息同紅利撥畀集美大學。

政治方面，陳嘉庚早年曾經入過同盟會支援反清革命。抗日戰爭期間，佢聯同其他南洋華僑捐咗一大筆錢支援國民黨抗日。戰後因為唔妥蔣介石獨裁，開始同中共友好，1949年應毛澤東邀請參加中國人民政治協商會議籌備會議，亦有份參加中華人民共和國開國大典。

1956年，佢成為全國僑聯創會主席，1961年8月12號與世長辭，享年87歲。