公

  想搵第二個意思嘅話，請睇公 (搞清楚)。

公（粵拼：gung1；♂），又叫雄性（粵拼：hung4 sing3），係講有性生物，佢係放出細同識郁嘅生殖細胞嗰一方，可以令到乸嘅生殖細胞受孕。要繁殖，公係唔可以少咗乸。

定義

開屏嘅雄性孔雀

幅相影到兩隻象鼻海豹公打交。

一隻大咗肚嘅海馬公；海馬交配嗰陣隻乸會將卵子交畀隻公嚟陀。

睇埋：精子、配子同乸

公可以以配子嚟定義，係繁殖過程當中供應精子（細粒啲嘅配子）嗰一方。

特徵

睇埋：性選擇同貝特曼原理

喺動物界，啲公成日都會為咗交配而競爭。

查理斯·達爾文發覺近乎一切嘅動物物種都有一種情況：公硬係會性慾強過乸，會為咗爭奪同啲乸交配嘅權利而打交，或者以其他方式競爭。例如好多物種嘅甲蟲都係啲公有角而啲乸冇角，公彼此之間會用角打交，打贏咗嘅就有權同啲乸交配。噉嘅情況喺好多種魚類、雀鳥以至哺乳類當中都可以觀察得到。

喺 1948 年，有生物學家做咗一場實驗：佢哋發覺一隻果蠅公嘅配偶數量愈多，生到嘅後代嘅數量就愈多；相比之下，乸就冇噉嘅情況—就算一隻乸有好多配偶，佢生到嘅後代嘅數量都唔會點升。首先，思考公同乸嘅生物本質—乸嘅配子（卵子）明顯大粒過公嘅（精子），噉就表示對於身體嚟講，生產卵子（同生產精子比起嚟）消耗嘅資源更多，而且喺多種動物裡邊，乸要花好多時間陀仔（例如人類生仔就要陀九至十個月咁耐），陀仔期間隻乸冇得繁殖；相比之下，公生產後代嘅能力唔受呢種限制。因此，公比較有誘因靠住「盡力搵乸交配，交配次數有咁多得咁多」嘅策略嚟行動，而乸繁殖機會有限，對配偶會比較揀擇，偏向揀高質素嘅伴侶，亦會投注更多資源落去每個後代嗰度。

睇埋

• 有性繁殖
• 兩性異形
• 求偶

參考

以下係呢篇文引用咗嘅學術文獻或者網頁：