雪山獅子旗
出自維基百科，自由嘅百科全書
雪山獅子旗原本係西藏軍旗，西藏政府曾經拎嚟做西藏旗，而家支旗係象徵自由西藏，或者西藏獨立，同時又係西藏流亡政府用嚟做國旗。
目錄 |
起源 [編輯]
自從9世紀因為吐蕃王朝分裂，所以西藏一直冇正規軍隊，一路到18世紀尾清朝嗰陣，清政府派兵幫西藏打走想入侵嘅人，之後制定《欽定藏內善后章程》，成立咗一隊三千人嘅藏軍 [1]，支旗就係咁喺1912年設計出嚟，用嚟做西藏軍旗。第十三世達賴喇嘛喺1918年頒布，正式由拉薩西藏政府採用。
1950年，中華人民共和國政府同西藏政府簽訂《和平解放協定》，解放軍進駐西藏之後，西藏旗就由五星紅旗取代。1959年，發生拉薩衝突，西藏人因為抵抗北京殖民統治，結果受到軍事鎮壓，殺咗八萬七千藏人，之後解放軍佔領西藏全境，又下令取締西藏政府，第十四世達賴喇嘛同八萬藏人離開西藏後[2]，呢支旗就畀中華人民共和國當係西藏獨立運動嘅標識，下令嚴格禁止唔畀拎出嚟用。不過香港因為基本法入面保障咗言論自由，所以呢支旗無喺中國大陸咁唔畀拎出嚟[3]，不過由於支旗因為太敏感，所以喺香港都唔容易買到，只可以上網訂[4]。
而家喺印度達蘭薩拉嘅西藏流亡政府，就繼續用緊呢支雪山獅子旗。
含意與精神 [編輯]
雪山獅子旗個設計有呢啲涵意：
- 中心個雪山象徵雪域西藏。
- 空中六道紅色嘅柱光象徵原始西藏民族之中，色、穆、冬、黨、哲、扎六大氏族。
- 紅色柱光同藍色天空象徵紅黑兩大護法護持政教事業。
- 雪山頂上升起嘅太陽，光芒四射，象徵雪域西藏全部眾生享受自由、信仰、富裕、幸福同公平公正。
- 雪山上嘅兩隻雪獅象徵政教結合事業戰勝一切。
- 高舉之具三色嘅寶焰象徵西藏人民永遠敬信同頂禮佛法僧三寶。
- 雪獅隻手舉住兩色嘅如意寶，象徵遵循十善法同十六人法為核心嘅正教中取捨善惡之法。
- 黃色邊框象徵佛法長駐人世直至普渡眾生事業完成。
另一個意思 [編輯]
除咗一個意思，又有人話佢有另一個意思，話中間隻獅子係象徵嗰陣嘅清政府[5]。
